Ika-18 nga Kapistahan sa Our Lady of All Nations Gisaulog

Ang Gagmay’ng Kristohanong Katilingban (GKK) sa Our Lady of All Nations nga nahisakop sa Parokya sa St. Mary of the Perpetual Rosary Parish, Buhangin nagsaulog sa ika-18 nga kapistahan sa Mahal na Patrona, Our Lady of All Nations sa Mayo 29, 2021 uban sa Tema: “SANTA MARIA among ulay nga Inahan, timaan sa paglaum niining panahon sa pandemya ug sulundon sa pagkamatinumanon sa kabubut-on sa Ginoo”, diin gipahigayon ang Santos nga Misa sa alas sa 6:00 sa buntag.

Agig pagpangandam alang sa kapistahan adunay siyam ka adlaw nga pagrosaryo ug pagnobena alang sa pagpasidungog ngadto sa Mahal nga Patrona. Niining higayona mapasalamaton ang mga miyembro sa katilingnan sa Mahal nga Inahan sa iyang makanunayong pagtabang sa matag usa pinaagi sa pag-ampo ngadto sa iyang anak nga si Jesukristo niining nasinati karon nga pandemya diin puno sa mga pagsulay ug kalisdanan nga naagian, apan kining tanan malampasan ra kung adunay pagsalig ngadto sa labaw’ng makagagahom. Adunay prusisyon nga gihimo sa tibuok Greenland- phase 2. Aron malikayan ang panagtapok ug masunod ang health protocols nga gimando sa gobyerno pipila lamang ka mga GSL ang mokuyog, ang katilingban mag sindi og kandila sa atubangan sa ilang panimalay nga ma-agian sa prusisyon.

Ang Senyora sa tanang Nasud, dakong GASA gayud sa katilingnan sa Greenland-phase 2, tungod niadtong tuig 2003 sa pag organiza pa lamang nga magtukod og GKK adunay mensahe nga nadawat gikan sa Tagbilaran, Bohol nga nangita sila asa ibutang ang Imahen sa Senyora sa tanang Nasud dire sa Mindanao. Sa dakung kalipay gidawat sa lumulupyo sa Greenland-phase 2 ang Senyora sa Tanang Nasud tungod niini gipa aprobahan sa kanhing Kura Paroko sa St. Mary of the Perpetual Rosary Parish, Msgr. Nelson Lucas nga maoy himoon nga Patrona sa katilingban sa Greenland-phase 2.

Nangaliyupo ang mga miyembro sa katilingban nga sa kanunay tabangan sa Mahal na Senyora sa tanang Nasud ang ilang panginabuhi niining panahon nga nasinati. SANTA MARIA ulay namong Inahan sa kanunay ikaw ang among dalangpanan ug among paglaum. Tudloi ang mga GSL ug miyembro nga mahisama kanimo sa pagkamasinugtanon sa atong Ginoo. Giyahi ang tanang GSL nga diha sa ilang pag alagad sa GKK ug parokya makalahutay ang tanan. Mahinangpon kaming maghatag diha kanimo og pasidungog ug maghalad og mga pag-ampo. Ang Senyora sa tanang mga Nasud nga kini mao si Maria, among manlalaban. VIVA MARIA! VIVA JESUS! (Aurelia Mori Abanggan | SMPRP GKK SoCCom)