Gigasahan aron mogasa

Pentecost Sunday (May 23, 2021)
Acts 2:1-11 / Ps 104:1, 24, 29-30, 31, 34 / 1 Cor 12:3-7, 12-13 or Gal 5:16-25 / Jn 20:19-23 or Jn 15:26-27 – 16:12-15

Unsa man kining gasa? Ang gasa makabag-o sa tawo- makabag-o sa iyang panglantaw sa kinabuhi, sa iyang prioridad, mga damgo ug mga ambisyon, mga relasyon, mga panginahanglanon, ug sa pamaagi sa pagkinabuhi.

Ang Adlaw sa Pentecostes nagpahinumdom kanato sa malungtarung gasa sa Dios- ang gasa sa Espiritu Santo. Sama pananglit sa gasa sa kalinaw: Maato lamang ang gasa sa kalinaw kon ang sentro sa atong kinabuhi mao ang Dios. Unta hatagan nato ug dakung luna sa atong pagpaningkamot nga mabuhi, ang Ginoong Jesus nga nabanhaw. Siya ang nagsaad kanato sa kalinaw.

Lain pang gasa; mao ang gasa pag-ila nga ang matag usa igsoon. Imbis mangita kita kon unsa ang panag-lahi nato sa usag usa-pangitaon nato kon unsa ang makahiusa kanato. Ang atong katilingban nasakit kaayo dili tungod sa kakabus sa materyal nga mga butang kondili daghan sa atong mga igsoon nag-antus nga nag-inusara ug wala na makakaplag ug mga higala nga makig-uban kanila.

Ang dugang gasa mao ang makanunayong pagpadilaab sa paglaum: Ang dalan sa paglaum mao ang pagpakiglambigit , ang pagtambayongay sa usag-usa. Pag-ila sa atong gasa nga aduna kitay kusog sa pagtabang sa uban. Aduna kitay mabuhat bisan sa gagmayng mga butang, apan malahutayon. Magpadayon kita sa pag-ampo nga ang mga Gasa sa Espiritu Santo magpabilin untang magdilaab sa atong mga katingkasing, aron isip Simbahan sa Dios, makapadayag kita sa kalipay ug mamunga sa kabag-ohan sa tibuok katilingban.