Confraternity of St. Joseph pagatukoron

Gibutyag ni Arsobispo sa Davao ug Presidente sa Catholic Bishops’ Conference of the Philippines (CBCP) ang damgo sa Simbahan nga matukod pag-usab ang Confraternity of St. Joseph. Kini iyang gipadayag atol sa iyang homiliya sa kapistahan sa Parokya ni San Jose sa Sasa niadtong Mayo 1 ug subli niyang gipanghinaut atol sa iyang programa nga Tingog Sa Magbalantay sa DXGN 89.9 Spirit FM niadtong Mayo 2.

Gisaysay ni Arsobispo Valles nga, “Ingon ang mga obispo, hinaut pa unta atong balikon o atong tukoron katong nabatasan na Confraternity of St. Joseph for the fathers.”. Kining iyang pangandoy dili lamang iyaha kondili sa mga kaobispohan sa Pilipinas ug ni Santo Papa Francisco mismo.

“Nalipay ko nga gisugdan na dinhi sa St. Joseph but niining fiesta day karon, it is my wish but dili lang kang Valles apan mao nay wish sa Santo Papa,” dugang ni Arsobispo Valles. Iyang gipadayag ang maong kalipay nga kini gisugdan na sa Parokya ni San Jose, Sasa, uban sa pagdasig ni Fr. Leonardo “Bong” Dublan, Kura Paroko.

Giawhag ni Arsobispo Valles ang tanan sa pagtinabangay sa pagpakaylap niining makatabang sa kalig-on sa atong pagtoo nga debosyon kang San Jose. Siya nagkanayon, “Kamong mga babaye tabang pud mo kay si Maria asawa man ni Jose, si Jose spouse of Mary. Kamong mga anak tabang mo ni San Jose, tabang mo ni Tatay nga si Tatay intawon dili ginahinganlan panday lang, si Tatay ma-sustain sa iyang pagka-tatay, sa iyang pagkapapa.”

Niining pagsaulog sa ika-500 nga tuig sa Kristiyanismo sa Pilipinas, nindot ni nga bunga sa damgo niining tibuok Simbahan sa Pilipinas. Ang maong confraternity nga langkoban sa mga kalalakihan makatabang sa pagpalig-on sa tagsa-tagsa ka pamilya. Panapos ni Arsobispo Valles nga ang “Confraternity of St. Joseph mao nay damgo sa simbahan sa tibook Pilipinas niining atong 500 years of Christianity celebration instance by the year of St. Joseph.”