Sr. San Vicente nakadasig sa pagpangalagad nga puno sa gugma ug kamanggihatagon

Malampusong gisaulog ang ika-8 ka tuig nga kapistahan ni Sr. San Vicente Ferrer nga maoy patron sa Gagmay’ng Kristohanong Katilingban (GKK) sa Ramon Nena-2, Cabantian sa Zone-1 nga nahisakop sa St. Mary of the Perpetual Rosary Parish. Ang tema sa kasaulogan sa kapistahan niining tuiga nagkanayon: “GKK San Vicente Ferrer, Padayon sa Pagpangalagad nga puno sa Gugma ug Pagkamanggihatagon, Luyo sa mga Pagsulay ug mga hagit sa atong Pagtoo”.

Aron makahuloganon ang kasaulogan sa kapistahan sa Mahal na Patron, Sr. San Vicente Ferrer gisugdan ang pagpangandam sa katilingban sa pagpahigayon og novena, hiniusang pag-ampo ug procession diin pinaagi niining mga kalihukan nahiusa ang mga miyembro sa katilingban nga ipadangat ang mga pangaliya ngadto sa Mahal na Patron.

Tungod sa pagpadayon sa pandemya ug adunay health protocols nga gipatuman, walay social activities ang gipahigayon panahon sa kapistahan. Ang kasaulogan sa Santos nga Misa alang sa maong kapistahan gipahigayon niadtong April 10, 2021 sa alas 8:00 sa buntag sa GKK San Vicente Ferrer Ramon Nena-2 Chapel nga gipangulohan sa Kura Paroko, Rev. Fr. Dionisio C. Tabiliran.

Pinaagi sa mga hiyas ni Sr. San Vicente Ferrer nga maoy sumbanan sa mga pangulo ug mga miyembro sa katilingban, nagpadayon ang kaligdong sa pagpangalagad sa mga GKK servant leaders ug makanunayong pag-ampo kauban ang mga miyembro diha sa pag-ampo sa rosaryo ug kasaulogan sa pulong bisan pa man sa mga pagsulay sa pagtoo niining panahon sa pandemya.

Tungod sa mga maayong panig-ingnan sa mga pangulo sa katilingban ug sa pagkamanggihatagon sa mga miyembro sa katilingban sa ilang talento, panahon ug bahandi napalambo dili lang espiritual nga aspeto kundili apil ang estruktura sa kapilya diin napahigayon ang pag renovate niini pinaagi sa pagtinabangay sa matag-usa ug kini gi bendisyonan sa Kura Paroko atol sa kapistahan sa Mahal na Patron, Sr. San Vicente Ferrer. (Jennifer Porras-Moreno, GKK SoCCom)