Puy-i ang mga bunga sa nabanhaw nga Kristo

Ika-duhang Domingo pagkabanhaw sa Ginoo (April 11, 2021)
Acts 4:32-35 | Ps 118:2-4, 13-15, 22-24 | 1 Jn 5:1-6 | Jn 20:19-31

Nabati mo ba ang presensiya ni Kristo nga nabanhaw? Unsa may mga timailhan sa iyang buhing presensiya human nga siya nabanhaw? Mao kini ang pipila ka mga bunga sa pagkabanhaw ni Kristo.

Kahiusa. Sa unang pagbasa, ang mga tinun-an ni Kristo nagkahiusa sa kasing-kasing ug huna-huna. Nahimong epektibo ang ilang pagsaksi sa pagkabanhaw ni Kristo tungod sa ilang pagpuyo diha sa kahiusahan. Walay nagutom ug nagkalisod kanila kay sila nagtinabangay sa usa’g usa. Kini usab unta ang atong puy-an ilabina niining panahona sa pagsulay ug kalisod nga dala sa pandemy. Magkahiusa unta kita sa pagtabang sa nagpait natong kaigsuonan. Moalayon unta kita sa laing-laing paningkamot sa mga pundok sa atong panggamhana ug Simbahan.

Kamasinugtanon. Ang ikaduhang pagbasa naghisgot nga ang tawo nga mituo ug nahigugma sa Dios, tawo nga masinugtanon. Tungod sa iyang gugma nga buot niya nga makapahimuot sa Dios. Kanang maong pagsunod sa kabubot-on sa Dios maoy naghatag kaniya’g gahom nga mobuntog sa mga tentasyon niining kalibotan. Dili siya maghinakog o mamintahan kay sayod siya nga nabag-o siya pinaagi sa pagkamatay ug pagkabanhaw ni Kristo. Mosunod unta kita sa mga gipakanaog nga mga lakang aron mahunong na kining kapiligro sa pandemya.

Kalinaw. Bisan sa mga kakuyaw ug kapiligro, ang matuohong mga tinun-an ni Kristo diha sa Ebanghelyo gigasahan sa Espiritu Santo nga maoy nagdala kanilag kalinaw. Taliwala sa mga peligro, maisugon silang mibarog batok sa daghang mga hulga. Walay nakapugong kanila nga magtigom aron malig-on sa pulong sa Ginoo ug paglihok nga maghatod sa pasaylo alang sa kalinaw. Hinaut unta nga molihok usab kita sa pagdawatay sa usa’g usa aron mapuy-an kanang maong kalinaw. Modawat unta kita sa kakulangan sa uban ug dili magpadala sa ilang kahuyang nga naangkon.

Busa sama sa atong Salmo, pasalamatan ta ang Ginoo kay ang iyang gugma makanunayon ug walay paglubad. Ang Pagkabanhaw sa Ginoo maghimo unta kanatong katawhan nga nahiusa, nagmasinugtanon ug nagmalinawon.