Mga Hiyas sa Maayong Magbalantay

Ika-upat nga Domingo sa Pagkabanhaw sa Ginoo
Acts 4:8-12 | Ps 118:1, 8-9, 21-23, 26, 28, 29 | 1 Jn 3:1-2 | Jn 10:11-18

Kanunay natong madungog kining panghitaboa: Anak, palihug bantayi ang bata nga imong manghod kay moadto ko sa Mercado. Unsay buhaton sa magulang? Kon natulog ang bata, iya kining mosketirohan aron dili makasulod ang lamok o mga insekto nga mokagat sa bata. Kon mohilak ang bata, iya kining kuguson o kantahan, aron mobalik pagkatulog o hinoon basin gigutom, magtempla siyag gatas, aron mabusog ug mobalik pagkatulog. Andam siyang dili mopahulay mabantayan lang ang iyang manghod. Kini ang sagad himoon sa magbalantay sa bata.

Ang atong ebanghelyo karon naghisgot sa usa ka Magbalantay nga mao ang atong modelo sa pagka-magbalantay. Si Kristo isip maayong Magbalantay adunay dakong gugma sa iyang mga karnero. Andam siya nga iula ang iyang kinabuhi alang sa iyang gihigugma. Kung mawala ang usa sa iyang panon, dili siya magduhaduha sa pagpangita sa matag usa, hangtud nga kini makaplagan. Si Kristo nahimong matinud-anon sa paggiya sa iyang mga karnero. Iya silang gitudloan sa sakto nga dalan aron dili sila mahisalaag.

Ang matag usa nga binunyagan, nga buot mosunod kang Jesus nga Maayong magbalantay, kinahanglan magbansay niining mga hiyas:

Adunay panglantaw: tataw kaniya ang padulngan sa iyang mga tawo ug mahibalong mangita sa hustong dalan. Ang tukmang padulngan mao si Cristo.

Pagkamatarung: Ang buhat ug ang pulong nagkahiusa. Maminaw sa mga magtutudlo nga mosaksi sa ilang gipamulong.

Pag-alagad nga puno sa gugma: Ang paggamit sa autoridad mao ang pagkamatinud-anon sa pag-alagad sa uban sama sa pag-alagad sa kaugalingong pamilya.

Kasaligan: buhaton dayon ang gisaad. “Ihatag ko kanimo ang akong kinabuhi, apan, paningkamotan mong alimahan kini.

Kahiusahan: nangandoy ug mobuhat nga mahiusa ang tanan, kay ang tanan, mahinungdanon alang kaniya. Mao kana si Jesus nga Magbalantay!