Mary, gifted to give (Part 1)

(An excerpt of the talk of Most Rev. Guillermo Afable, D.D., Bishop of Digos during the Lenten on air and online recollection via DXGN 89.9 Sprit FM-Davao, March 24, 2021.)

Isip mga deboto ni Birhen Maria, nasayod ko nga daghan kaayo ta’g kasinatian mahitungod sa mga gasa, mga panalangin o grasya nga atong nadawat pinaagi sa atong pag-ampo ug pangamuyo sa atong Mahal nga Inahan Birhen Maria.

Buot lamang nako nga ubanan kamo sa paghatag og pansin inining usa ka bahin sa iyang pagkagasa. Siya giila pinaagi nianang Putling Kasing-kasing ni Maria.

Niining panaw nato sa 500 katuig nga gigasahan sa pagtoo diha ni Kristo, kabahin niining panaw sa pagpangandam niiing kasaulogan sukad pa niadtong 2013 nahimo nang kabahin sa maong panaw ang atong pagka-Pueblo Amante de Maria, kining katawhan nga hilabihan kaayo ka mahigugmaon sa Mahal nga Birhen Maria nga Inahan sa Dios.

Sa atong panaw sa pagtoo, dakong bahin niini ang atong debosyon sa atong Mahal nga Inahan. Ug tungod niini, mga igsuon, sa sinugdanan pa lamang sa mga katuigan sa pagpangandam gidesisyonan na sa mga kaobispohan nato nga matag tuig niining 9 katuig nato sa pagpangandam sa kasumaran niining 500 katuig sa pagka-Kristohanon, nga himuon nato ang konsagrasyon ngadto sa Putling kasing-kasing ni Maria. Isip usa ka katawhang Pilipinhon, isip usa ka Simbahan dinhi sa Pilipinas nga maghiusa kita sa pagtugyan sa tanan kabahin niining atong nasod nga Pilipino ngadto sa Putling kasing-kasing ni Maria matag pangilin niya sa Memorial sa Immaculate Heart of Mary. Kay kasagaran, matag Hunyo ginasaulog. Niadtong 2013, gisugdan nato kining National Consecration to the Immaculate Heart of Mary sa June 8, 2013. Niining tuiga mao ang ikasiyam katuig sa Nobena nga mahitabo karong June 8 niining tuiga.

Kining konsagrasyon sa Putling kasing-kasing ni Maria bisan tuod og dugay na kini nga kabahin sa tradisyon sa Simbahan, apan niinng mga naulahing mga katuigan, natagaan nato og dugang pansin tungod sa hitabo nga kasumaran sa Centennial sa Our Lady of Fatima diin siya nagpakita didto sa Portugal sa Fatima niadtong May 13, 1917 ug hangtod October 13, 1917. Sulod sa 6 ka bulan nagpakita sa 3 ka mga bata, si Francisco, si Jacinta ug si Lucia.

Ug kabahin sa maong mga pagpakita sa Mahal nga Birhen Maria, ang atong Mahal nga Birhen nagdala og importante kaayong mensahe para sa kalibotan alang sa kaluwasan sa kalibotan ug alang sa kalinaw sa kalibotan. Ug kini iyang gipadayag niadtong June 13, 1917 diin ang atong Mahal nga Birhen nagpahayag nga ang Ginoong Hesus buot nga ipakaylap sa tibuok kalibotan ang debosyon sa iyang putling kasing-kasing sa iyang Inahan. Ang Ginoo mismo buot nga kining maong debosyon sa Immaculada sa Putling kasing-kasing ni Maria mapakaylap sa tibuok kalibotan. Mao to nga sa 2017 sa Centennial nabalik-lantaw nato, nga oy nakalimtan na nato kining gipangayo sa atong Mahal nga Birhen. Gani ang maong pagbuot mismo gikan gayod sa atong Ginoo nga tagaan og pagtagad ug bili ang Putling kasing-kasing ni Maria.

Mao na nga sa 9 katuig sama sa giingon nako nga gitagaan pud og importansiya sa atong Simbahan karon sa Pilipinas nga matag tuig gina-renew, ginausab, ginabag-o nato. Mao na nga karong umaabot nga Hunyo 12, 2021 himuon nang ika-9 nga National Consecration to the Immaculate Heart of Mary. Kining konsagrasyon sa Putling kasing-kasing ni Maria, kabahin kini sa debosyon ngadto sa iyang Putling kasing-kasing nga gipangayo mismo sa atong Ginoo pinaagi sa atong Mahal nga Inahan nga iyang gipadayag ngadto sa mga bata. Ug gani, si Lucia nagpabilin dinhi sa kalibotan sa dugay’ng panahon. Namatay siya og 97 years old na. Ug ang espesyal nga misyon nga gibilin sa iyaha, gisangon sa iyaha mao kining pagpakaylap sa debosyon sa Putling kasing-kasing ni Maria.

Niining mga katuigan nga preparasyon sa atong 500 years nga kasumaran sa atong pagtoong Katoliko, Kristiyano dinhi sa Pilipinas, mapasalamaton kita nga mianhi diri mismo sa atong nasod ang usa ka bantogan kaayo nga mamumulong ug manunulat nga dako kaayo ang iyahang nahimo nga misyon sa Divine Mercy ug sa Immaculate Heart of Mary. Siya si Fr. Michael Gaitley nga kauban sa Missionaries of the Immaculate Conception. Ug kini siya usa sa dakong misyon nga iyang nahimo karon mao ang pagpausabaw pa ug pag-promote ug pagpalambo pa sa debosyon sa Puling kasing-kasing ni Maria ug kining Consecration to the Immaculate Heart of Mary.

Gani naay siyay libro nga famous kaayo nga 33 Days to Morning Glory, 33 ka adlaw nga pagpangandam sa Consecration to Mary. Gani gitagaan kita niya og pagtugot nga ang maong libro mahubad sa binisaya. Ug usa sa among pari diri sa Digos, si Fr. Judito Tampon, maoy naghubad niining maong libro, nga karon, akong ipakita sa inyo nag-ulohan nga 33 Ka Adlaw Ngadto sa Himaya sa Kabuntagon. Mao ni ang Cebuano translation sa libro ni Fr. Michael Gaitley.

Ug dinhi mga igsuon, sulod sa maong mga adlaw, hinay-hinay gipamalandongan ni Fr. Michael Gaitley ang unsa ning unod sa consecration sa Putling kasing-kasing ni Maria. Ug kini maoy akong hisgotan karon kay kining moingon ta nga unsa may labing importanteng hiyas sa atong Mahal nga Inahan nga maoy iyang gigasa nga mao pud ang gasa nga iyang nadawat.