KNOT: Rudy

Dear KNOT,

Maayong adlaw sa tanan. Ako usa ka Amahan, minyo ug dunay tulo (3) ka mga anak. Ang among lugar diin asa kami nagpuyo, dili gayud malikayan nga makig angay sa mga silingan. Mga higala nga susama nako nga Amahan sab. Kasagaran, inig magkatapok na gani dili gyud mawala kining inum. Halos matag adlaw o gabii human sa among tagsa-tagsa ka mga trabaho, hinay-hinay na ug tapok, dayun tu-a sugod na ang session hangtud kadlawon.

Kining akong kamaguwangang anak maoy tig sundo nako aron papaulion kay bisan og lawum na ang kagabhion, kami nag sige gihapon og padayon. Sa pagka sunod adlaw mao gihapon ang mga panghitabo. Balik-balik na lang kini nga routine kay lagi maikog ko nga mubalibad. Sa pagkatinood lang dili na kini sila mga laing tao nako tungod kababata ug suod nga mga higala.

Sa nagkadugay, akong gibati ang kaluoy sa akong anak nga maoy ga sundo nako aron papaulion kay sa tungang gabii mo bangon gikan sa pagkatulog aron ako sundoon. Ang akong asawa dili lamang siya manumbaling kay nasayod siya nga anaa lang ako sa silingan apan kabalo ko nga duna na siyay kaligutgut nganha nako.

Sa akong kabahin, gusto na ko nga muiwas sa ingon ining mga buhat ug igahin ang tanang oras ug panahon sa akong pamilya apan lagi daw magnet nga mosulong gayud sa tapok-tapok uban sa mga higala. Usahay nga kung wala ako sa tapok, ila gyud kong aghatun nga mosabay unya maglisud na ko ug balibad.

Unsay angay kong buhaton nga mahunong na kining maong cycle matag adlaw ug gabii sa pamaagi nga dili nako sila mapasakitan. Bisan tuod nga ingon-ana, mga higala ko gihapun sila. Daghang Salamat.

Yours Truly,
Rudy

* * * * * *

Dear Rudy,

Kitang tanan dunay nagkada-iyang mga pagsulay. Dunay mga higayon nga sukdon asa kutob ang atong kahuyang. Ang pakighigala kalakbit na niining matapyasan ang atong oras sa pamilya apan ang importante nga atong masayran ang kamahinungdanon sa duha. Pamilya ug Higala. Atong tagaan ug mas labi ang gibug-atun. Kinahanglan nga duna kita’y prority labaw sa uban. Limitasyon ug pagdumala sa oras.

Daghan Salamat,
KNOT