Kapistahan sa Diosnong kalooy Mabungahon

Ginoo, nagasalig kami kanimo. Unsa ba kadako ang atong pagsalig sa Ginoo? Sama ra ba kini sa istorya o gasalig ta sa tanan natong kinabuhi ug gugma. Ang kapistahan sa Diosnong Kalooy nagtimaan sa dakong pagsalig kaniya sa tanang pagsulay sa kinabuhi, ana-a siya nagagiya kanato.

Ang giatubang nga pandemya dili kini babag nga padayonon nga saulogon sa Gagmay’ng Kristohanong Katilingban (GKK) sa Divine Mercy, Greenland Phase 1, nga nahisakop sa Parokya sa St. Mary of the Perpetual Rosary ang ika-14 nga kapistahan sa Diosnong Kalooy nga adunay tema nga nagkanayon: “Diosnong Kalooy Tuburan sa Kinabuhi, Grasya ug Pagkamanggihatagon sa imong Katawhan”.

Atol sa Biyernes Santo, Abril 2, 2021 gisugdan ang novena agi’g pagpangandam sa kapistahan niini. Walay social activities nga gipahigayon tungod sa pagsunod sa mga health protocols. Busa ang Santos nga Misa sa maong Kapistahan pagahimoon sa St. Mary of the Perpetual Rosary Parish Church sa Abril 11, 2021 sa alas 6:00 sa buntag.

Kining maong kapistahan nagpakita og dakong pagtoo ug gugma sa Diosnong Kalooy. Ang iyang pagkamaloloy-on ug pagkamanggihatagon niini maoy nahimong giya sa matag pangulo ug miyembro sa katilingban, nga bisan pa sa tanang kalapasan ug nagkalain-laing kinaiya aduna gihapoy panaghiusa ug pagtinabangay sa matag-usa. Ang mga pangulo ug miyembro sa katilingban sa kanunay andam mogiya ug mohatag suporta, og material man o spiritual labaw na sa mga kabatan-onan. Kini nahimong buhing timaan sa pagsalig sa Diosnong Kalooy na andam mohatag sa iyang dakong gugma ug pag agak kanato.

Sama sa among pagsalig sa Diosnong Kalooy, kami usab nagasalig sa matag pangulo ug miyembro sa katilingban na sa kanunay ana-a ang pagtinabangay ug ipakita ang timaan sa pagkamaloloy-on. (Melagros Nakahara, GKK SoCCom)