GKK, gifted to give (Part 1)

(An excerpt of the Most Rev. Medil Aseo, Bishop of Tagum, during the online and on air Lenten recollection via DXGN 89.9 Spirit FM-Davao, March 26, 2021.)

Ang gitahas kanako sa pagpamalandong bahin sa Kwaresma 2021, mao ang atong mga Gagmay’ng Kristohanong Katilingban kon GKK, sa tema nga GKK gifted to give. Ang tema nato atol sa ika-500 years sa atong pagka-Kristiyanos.

Ang akong ipaambit nga mga personal nakong kasinatian, labina diri sa Diosesis sa Tagum diin ako nadestino. Ug ako pung gidugangan diha sa mga pamalandong sa libro ni Fr. Jim Kroeger nga gititolohan “Go, Teach, Make Disciples.”

Sugdan nako tingali sa akong mga kasinatian sa Barangay Sang Birhen sa tuig 1959 to 1961. Sa wala pa matukod ang mga Gagmay’ng Kristohanong Katilingban, mga 1959 ngadto sa 1961, aduna nay mga “house to house” nga mga pag-ampo sa pagrosaryo pinaagi sa Barangay Sang Birhen. Ibalhin-balhin ang imahen sa Mahal nga Birhen sa mga kabalayan, mga alas 6:00 sa gabii. Ang motambong sa mga kasilinganan magrosaryo kon asa ang estandarte gidawat nga balay. Unya, sa pagkahuman ibalhin ang estandarte ngadto sa laing balay nga modawat niini.

Samtang magalakat ang prosisyon, mag-awit sila og mga awit pahinungod kang Maria. Ug sa dili pa manglakat, ang mga naghatod kang Mama Mary, manganta sila og panamilit, sama niani sa akong nahinumdoman, “Dios Birhen, Maria, mangluhod man kami, adios Birhen Maria, adios, adios, adios.” Di gyud ko kalimot niana kay sa bata pa ko tig-uban-uban man ko ani. Unya, basta human na mi’g kanta ani, painit naman gyud ni ang sunod ani.

Kini ang larawan nga ang Mahal nga Birhen Maria maoy kahiusahan sa mga pundok sa kabalayan nga maingon nato nga katilingban nga nagkahiusa diha sa pag-ampo kang Maria. Mao ni ang gitawag og Barangay Sang Birhen. Barangay, anggid-anggid na katilingban, kini maingon nato nga katilingbanong panag-uban sa mga mag-alampo nga sagad mouban sa pagpahinungod kang Maria sa mga kabalayan. Apan kini siya limitado ra nga pagka-katilingban.

Ang unang tuig sa mga Maryknoll Fathers nga akong nasinati didto sa akong lungsod sa Kapalong, kay taga Kapalong man ko, mga 1960 to 67, nagsugod ang mga katilingban, mga paglihok sa kapilya. Niining tuiga, 1963 to 1967, naa pa ko sa Elementary. Sakristan ko sa mga Maryknoll Fathers. Ug nahibalo ko nga kini pud si Archbishop Muloy Valles body-body pud ni sa mga Maryknoll didto sa Lupon, sa Bato-bato.