Gatusan Ka Mga Hamtong Kristiyanos Na

Niadtong Abril 11, 2021, adunay 157 ka mga hamtong ang nakadawat sa Sakramento sa Bunyag ug Kompirma. Gipahigayon kini sa parokya sa Our Lady of the Miraculous Medal sa Indangan ubos sa pagdumala sa kura paroko nga si Rev. Fr. Jesus Samaniego ug sa mga katekista sa maong parokya.

Una midawat sa maong Sakramento ang mga bunyaganan, adunay pre-baptism catechesis nga gihatag kanila niadtong Abril 10, 2021. Kini nga kalihukan gihimo agi’g pagsaulog sa ika-500 ka tuig sa Kristyanismo dinhi sa Pilipinas.

Sulod sa 157 ka hamtong, 12 niini gikan sa laing mga sekta ang midawat sa pagtoong Katoliko pinaagi sa maong bunyag nga gipahigayon. Apan sa wala pa ang adlaw sa pagbunyag, gihimo ang pag interview kanila ni Fr. Jess aron masuta nga ang ilang pag pabunyag sa maong pagtoo tinuoray ba gayud ug kung sila andam ba sa pagdawat sa maong pagtoo. Tuod man walay usa kanila nga wala kabunyagi, ang tanan nakadawat gayud sa pagtoong Katoliko.

Matud pa ni Fr. Jess sa iyang homiliya panahon sa rito sa Bunyag, iyang giawhag ang matag usa ka binunyagan nga mohimo sa ilang obligasyon isip magtutuong Katoliko ug sa pagpuyo niini pinaagi sa paggahin ug panahon kausa sa usa ka semana alang sa Ginoo. “Simba kausa sa usa ka semana, simba sa adlaw’ng Domingo aron mapakita nimo sa Dios nga ikaw gusto makig uban Kaniya pag-abot sa eksaktong panahon,” panapos sa kura paroko. (Anabelle Encluna | OLMMP Soccom)