Ang Relasyon Tali sa Ginoo ug sa Tawo

Ika-limang Domingo sa Pagkabanhaw sa Ginoo (May 2, 2021)
Acts 9:26-31 | Ps 22:26-27, 28, 30, 31-32 | 1 Jn 3:18-24 | Jn 15:1-8

Niining Ikalima nga Domingo sa Pagkabanhaw, ang atong mga pagbasa nagpunting sa relasyon sa tawo ngadto sa Ginoo; ug sa relasyon sa tawo ngadto sa iyang isigkatawo.

Ang relasyon sa Ginoo ug sa tawo gipadayag sa atong Ginoong Jesucristo pinaagi sa usa ka sambingay, “Ako ang punoan sa paras, kamo ang mga sanga.” Niining bahina, gitudlo ni Jesus sa iyang mga tinun-an ug kanatong mga “gisumpay” o nahiusa kang Jesus pinaagi sa bunyag, nga ang Iyang relasyon uban kanato wala natapos sa iyang kamatayon. Si Jesus nagpabilin uban kanato kanunay.

Gitudloan usab kita ni Jesus bahin sa kamahinungdanon sa mga Pulong nga Iyang gitudlo kanato. Sama nga si Jesus magpabilin uban kanato, mao usab ang Iyang mga Pulong. “Kung kinsa ang magpabilin kanako, ug Ako kaniya, kini makabunga ug daghan.” Mao kini ang sukaranan sa pagpadayon sa pagbuhat sa mga buluhaton nga Iyang gisugdan. Diha sa pagpadayon sa nasugdan ni Kristo, kita makapamunga og maayo. Kining maong relasyon tali sa Ginoo ug sa tawo nagdala usab kanato sa atong relasyon ngadto sa atong isigkatawo.

Ang relasyon natong mga tawo ngadto sa Ginoo mamatuto ug mapatubo diha sa atong maayong relasyon ngadto sa atong isigkatawo, mapalig-on diha sa pag-ampo, ug mapalambo diha sa pagsulti sa matuod ug pagbuhat og maayo. Kung dili maayo ang atong relasyon ngadto sa atong isigkatawo, sama ra nga gihubad nato ang bugkos nga naghiusa kanato kang Kristo kinsa maoy punoan sa atong pagka-Kristiyano.

Nan, aron makapamunga kita og maayo, dili kita mubulag kang Kristo pinaagi sa pagpadayag niini diha sa atong isigkatawo. Tan-awon nato ang matag-usa sa susamang pagtan-aw sa Ginoo kanila. Trataron nato ang matag-usa sa paagi nga kita gitratar sa Ginoo. Kay dili nato mahimo nga bulagon ang paras gikan sa mga sanga ug dili nato mahimo ang pagbulag sa mga sanga gikan sa paras.