Wala nay sulod ang lubnganan

Pasko sa pagkabanhaw sa Ginoo (April 4, 2021)
Acts 10:34, 37-43 | Ps 118:1-2, 16-17, 22-23 | Col 3:1-4 or 1 Cor 5:6-8 | Jn 20:1-9 or Lk 24:13-35

Walay sulod ang mga simbahan niadtong miaging tuig tungod kay gisuspende ang mga Santos nga Misa nga adunay mga tawo. Apan wala maundang niadto ang mga pagsaulog sa Misa. Gani nahimo usab kini pinaagi sa radyo ug sa internet ug uban pang mga hitsas sa komunikasyong sosyal.

Karong adlawa, Pasko sa Pakabanhaw sa Ginoo, diin gihandum sa nasod Pilipinhon ang unang Misa sukad miabot ang mga misyonerong Espanyol aron kita mabunyagan nga mga Kristiyano. Sama kang Maria Magdalena ug kaubang mga tinun-an diha sa Ebanghelyo, madasigon ba kita nga magdagan aron pagpangita sa nabanhaw nga Ginoo sa mga lugar nga daw wala na ang presensiya sa Dios? Human sa 500 katuig isip mga Kristiyano, milambo ba ang atong kaikag sa paghimamat ug pagpaila sa nabanhaw nga Kristo ngadto sa uban, ilabina sa mga nawad-an sa paglaum nga mahimamat ang Ginoo panahon sa mga pagsulay?

Sama kang Pedro diha sa unang pagbasa, garbo ba nato nga imantala ang kamatuoran sa nabanhaw nga Kristo sa mga tawo nga misimang na sa ilang kinabuhi? Isip mga tumutuo ni Kristo nga Pilipinhon sulod na sa 500 katuig, unsa ba kita ka matinud-anon diha sa atong pagpalalum ug pagsabwag aron si Kristo mailhan sa tanan?

Kung nakapanaw kita uban kang Kristo, mabuhi usab kita uban kaniya. Sama nga kung kita maghuna-huna kanunay sa unsay hilig ug ganahan nato nga mga pagkaon o butang o buluhaton, kung si Kristo usab maghari sa atong kasing-kasing, nan maghuna-huna usab kita sa mga butang langitnon sama sa giingon sa ikaduhang pagbasa. Busa, kinsa ba o unsa ba ang gilayon atimanon nato kung momata kita sa buntag matag adlaw? Ang Ginoo ba nga angay natong daygon tungod sa iyang pagluwas kanato o kaha ang facebook, o twitter ug uban pa?

Tinuod lamang nga magsadya kita niining adlawa kung maangkon nato ang presensiya sa nabanhaw nga Kristo. Kung kini maghari sa atong kasing-kasing, andam kita nga mopalapnag kaniya sa tanan, ilabina sa mga nangita sa iyang presensiya. Busa sama nga nangandoy kita sa pagsulod sa simbahan, makita unta sa tanan ang kaayo ug pagmahal sa Dios nga nabanhaw pinaagi sa maayo natong kinaiya ug buhat. Malipayong Pasko sa pagkabanhaw sa atong Ginoo!