Tambag-pastoral alang sa umaabot nga Domingo sa Lukay

Sa tambag-pastoral numero 2 sa tuig 2021, gipagula ni Arsobispo sa Davao niadtong Pebrero 19, 2021 ang mga giya nga sundon sa pagsaulog sa Domingo sa Lukay sa Arkidyosis sa Davao. Kining maong mga giya subay sa mga giya nga gipagula sa CBCP ug sa Vatican alang sa umaabot nga Semana Santa.

Gawas sa naandan nga pahimangno sa mga protocols sama sa face masks ug face shield, social distancing, marka diha sa lingkuranan, QR code, thermal scanners, footbaths, entrance ug exits ug sanitizing, gipahinumdoman ni Arsobispo Valles ang pagpahigayon niini uban sa pagbantay sa gidaghanon sa tawo nga moapil.

Iyang gipahinumdoman ang mga mangapil niini sa radyo ug live streaming sa facebook sa DXGN 89.9 Spirit FM nga dili na kinahanglan nga mangayo pa og Holy Water atol sa ilang pagbitbit niini panahon sa pag-ampo nga pagahimoon sa ministro aron pagpanalangin niini. Mosunod lamang sila sa mga kasaulogan pinaagi sa pagpaminaw ug pagtan-aw niini.

Atol sa pagpanalangin sa mga lukay diha sa Simbahan, giawhag ni Arsobispo Valles nga magpabilin lamang sa mga lingkuranan ang mga tawo nga magbitbit sa ilang mga lukay samatang magsabot daan ang mga ministro sa ruta diha sa daplin ug sa gawas sa Simbahan aron pagabisbisan sa Holy Water ang mga tawo uban sa ilang mga lukay.

Gidasig gihapon nga usa lamang ang mokanta ug nga ang mga tawo mamahimo nga dili na mokanta aron malikayan ang posibleng pagkuyanap sa sakit. Gipanghinaut nga adunay igong mga batan-on nga mobulontaryo sa pagpanghatag sa kalawat ug uban pang mga lihok sulod sa balaan nga kasaulogan.

Aron malikayan ang pagdagsa sa mga tawo gilauman nga dugangan ang mga Misa kon mahimo. Mamahimo usab nga gamiton ang parking area alang sa lugar nga pagapundohan sa mga tawo aron dili kini magpunsisok sulod sa Simbahan.

Anaa na sa desisyon sa Pari ang pagplano kung unsaon pagpahigayon ang mga maulahi og abot nga mohangyo sa pagbasbas sa Holy Water sa ilang mga lukay.

Gikinahanglan, matod pa ni Arsobispo Valles nga kining tanan himuon nga puno sa Solemne ug disente nga lugar ug mga pahimutangan sa mga gikinahanglan nga gamit.