Pandemya, dili babag sa Dalan sa Krus 2021

Nagpadayon sa pagpahigayon og Dalan sa Krus ang Parokya sa St. Mary of the Perpetual Rosary sa Buhangin taliwala sa nasinati nga pandemya niining panahon sa kwaresma.

Aron masunod ang health protocols nga gipatuman sa atong gobyerno gi-uyonan sa mga miyembro sa Parish Pastoral Council inubanan sa Kura Paroko, Fr. Dionisio Tabiliran ug Parochial Vicar, Fr. Rey Sabuero nga pagahimoon ang matag Estasyon sa Krus kon Dalan sa Krus sa pinili nga Gagmay’ng Kristohanong Katilingban (GKK) nga nahisakop sa Parokya. Kini nagpasabot lamang na dili babag ang pandemya sa mga magtutoo ni Kristo.

Pebrero 19, 2021 maoy unang Biyernes pagkahuman sa Miyerkules badlis timailhan nga anaa na kita sa panahon sa kwaresma. Unsa man ning kwaresma? Ang kwaresma panahon sa pagbag-o sa atong kinabuhi. Kini, usa ka panaw sa pagpahilayo sa sala nga dili lamang kutob sa gawasnong buhat sa pagpuasa, pag-ampo ug pagpenitensya. Kini nagtawag sa pagbag-o sa kasingkasing og pagbiya sa dautang kinabuhi. Ang atong mga buhat sa pagpenitensya ug pag antos maoy magdala kanato ngadto sa kasantos. Ang atong pagpuasa, maoy makatabang kanato sa pagbiya sa atong kahakog ug makakat-on unta kita sa pagpaambit sa uban. Magpadayon kita sa atong panaw ngadto sa kahingpitan.

Niining unang Biyernes sa Dalan sa Krus, ang ruta gipahigayon sa mga mosunod nga GKK:

Sta. Teresita, CubCub, Cabantian – Unang Estasyon: Ang Katapusang Panihapon
Our Mother of Perpetual Help, VillPark, Cabantian – Ikaduhang Estasyon: Ang Kasakit sa Getsimani
San Vicente Ferrer, Suraya, Cabantian – Ikatulong Estasyon: Si Jesus gihukman nga Mamatay
Divine Mercy, Cabantian – Ikaupat nga Estasyon: Si Hesus gilatos ug gipurong-purongan og mga Tunok
San Agustin, Forestal, Cabantian – Ikalima nga Estasyon: Si Hesus gipapas-an sa Krus
San Vicente Ferrer, Ramon Nena, Cabantian – Ikaunom nga Estasyon: Si Jesus nahisukamod
San Isidro Labrador, Communal – Ikapitong Estasyon: Si Simon Cireneo mitabang kang Hesus pagpas-an sa Krus
San Miguel Arkanghel, Communal – Ikawalong Estasyon: Nakasugat ni Hesus ang mga Babaye sa Herusalem
Divine Mercy Greenland phase1, Cabantian – Ikasiyam nga Estasyon: Si Hesus gihuboan sa iyahang sapot
Our Lady of All Nation, Greenland phase2, Cabantian – Ikanapulo nga Estasyon: Ang gipasaylong Kawatan
San Isidro Labrador-2, Buhangin – Ikanapulo’g usa nga Estasyon: Si Maria ug ang pinanggang tinun-an sa tiilan sa Krus
San Nicolas De Tolentino, Buhangin – Ikanapulo’g duha nga Estasyon: Ang Kamatayon ni Hesus
San Vicente Ferrer, Orchids, Buhangin – Ikanapulo’g tulo nga Estasyon: Si Hesus gisulod sa lubnganan
Our Lady of Fatima, Buhangin – Ikanapulo’g upat nga Estasyon: Ang pagkabanhaw ni Hesus

Dako kaayo ang kalipay ug pasalamat sa mga parokyano sa St. Mary of the Perpetual Rosary Parish nga gipahigayon ang estasyon sa krus sa mga katilingban og dinhi makita kung unsa kahinangop ang matag usa mabata man, hamtong og ilabina gayud ang mga senior citizen nga sila nakaduyog sa maong Dalan sa Krus. (Awing Mori Abanggan | St. Mary of the Perpetual Rosary Parish GKK SocCom)