Pag-ampo giawhag alang sa mga pagaordinahan

“Busa pag-ampo kamo sa tag-iya sa anihon aron magpadala siyag dugang pang mamumoo nga moani niini” (Mt. 9:38).

Sa sulat-sirkular numero 09 nga gipagula ni Arsobispo sa Davao, Romulo G. Valles, D.D., niadtong Pebrero 24, 2021, iyang gipahibalo ngadto sa mga Kura Paroko nga gidawat na ang hangyo nila Seminarista Jerick B. Asdang nga taga Parokya sa Immaculada Concepcion sa Penaplata ug Ranebe J. Magallanes nga taga Parokya sa San Isidro sa Catalunan Grande nga ordinahan sa pagka-diakono.

Kini giaprobahan ni Arsobispo Valles, human nga nasuta niadtong mga may kalabotan sa ilang pormasyon nga sila angayan nga paga-ordinahan. Gawas nga gihangyo ni Arsobispo Valles ang pagpahibalo niini sa matag Parokya atol sa ilang Misa sa Pebrero 28, Marso 7 ug 14, giawhag usab sa Arsobispo “ang tanan sa pag-ampo alang sa duha ka pagaordinahan sa pagka-diakono.”

Sila migradwar sa pagtuon sa Teolohiya sa St. Francis Xavier Regional Major Seminary ug nakatapos na sa nagkadaiyang bahin sa ilang pormasyon sa dili pa modawat sa Ordern sa Pagkadiakono diha sa ilang mga reponsibilidad sama sa laing-laing pagpatilaw diha sa kinabuhi sa mga Parokya, apostolado ug sa seminaryo.