Kwento ng Ordinaryong Tao: Tricycle driver

Dear KNOT,

Ako usa ka tricycle driver. Nagpangidaron og 35 anyos. Minyo ug dunay duha ka anak.

Ang kamaguwangan 8 years old ug ang kamanghuran 4 years old pa lang. Taliwala sa pandemya ang akong asawa dunay permanenteng trabaho sa usa ka pribado nga kumpanya kaluoy sa Dios. Intawun ang uban nawad-an sa panginabuhian, trabaho ug mga tulunghaan nanarado. Pait kaayo ang kahimtang sa kasagaran kay tungod lagi sa kawad-un gidut-an pa hinuon ug samot sa pagkaylap niining sakit nga covid.

Dear KNOT, sulod sa akong kinse ka tuig sa pagpamasada, ang akong abot igo ug sakto ra nga makasalbar sa pagkaon adlaw-adlaw. Apan hinuon ang abot sa akong asawa mas dako kumpara kanako nga kung sumahon maoy nagbuhi kanamo tibuok pamilya. Sa iyang pagpaningkamot ug panarbaho, akong nabatyagan nga gibati na siya og ka-kapoy matag uli gikan sa pagpanarbaho.

Dili kalikayan Dear KNOT nga bati-on ko ang ka-luoy ug ka-ulaw sa akong asawa tungod sa sitwasyon nga kung buot huna-hunaon dapat ako ang dunay mas labaw nga nahimo tungod ako ang Padre de Pamilya ug aron nga dili na kapuyon ang akong asawa. Wala akoy mahimo Dear KNOT apan sa padayun ug pagpamasada. Doblehon ko na lang ang akong pagpaningkamot aron makatabang ug maka minus sa kalisud, apan lagi sa pagpamasada isip usa lamang ka tricycle driver sakto ra ug dili ingon ana kadako ang kita.

Dear KNOT, bisan sa among kahimtang walay reklamo ang akong asawa. Tuod man nga medyo lisod, sayod ako nga anaa ang Gino-o naga-uban sa among Pamilya, nga mao ang nagapagaan sa among pagpamuyo aron hapsay ug layo sa peligro. Nanghinaut ako nga tagaan ako ug igong kusog aron sa kanunay maka padayon sa pagpamasada ilabi na gayud ang akong asawa.

Daghang Salamat,
Lando

* * * * *

Dear Lando,

Ang sitwasyon kung asa (1) ang asawa maoy empleyado sa opisina ug ang bana dili, apan naay laing panginabuhian, (2) ang asawa maoy mas daku ug sweldo kumpara sa bana, ug, (3) ang asawa maoy naga opisina ug ang bana “house husband”…ordinaryo na kini sa kasamtangang panahon. Dili na pareho kaniadto nga ang asawa naa ra sa balay, mag-atiman sa mga bata, mag manage sa tibuok pamilya ug ang bana maoy manarbaho aron naay ikabuhi ani. Apan duna gihapon uban nga dili pa gyud abli ang panglantaw sa sitwasyon sama sa inyo karon. Usahay dili malikayan nga ang bana makabati ug insecurity, kaulaw, o di kaha mubo ang panglantaw sa kaugalingon, ug murag “powerless” sa mga desisyon nga pagabuhaton sa magtiayon.

Ang kinabuhing minyo usa ka partnership ug teamwork – ang asawa ug bana mahimong usa na, (considered as ONE), dili magpabilin nga separate. Mao nga dapat walay kumpetisyon apan mag complement ang usa’g usa sa ilaha, alang sa kaayuhan sa pamilya.

Ang sitwasyon sama sa inyo, usa ka maingon nato nga very humbling experience. Kinahanglan gyud ang pagpailub, respeto, pagtinabangay nga walay kwentahanay. Assure your spouse of your love and support regardless of who brings the bigger bacon to the family. Ang pagkatao ang labing bililhon kumpara sa anumang kayamanan. Daghang mga butang nga dili maangkon sa kwarta. Sa imong kabahin, naa kay panahon makauli aron mamonitor ang inyong mga anak sa mga oras nga wala kaayo pasahero. Dili makwenta sa kwarta ang quality time nga imong magahin alang kanila bisag unsa ka limitado kini. Mahinungdanon kamo sa komunidad ilabi na kung dili maayo ang panahon ug makaadto kamo sa mga lugar nga dili maabot sa ubang sakyanan. Nahimong sayon para sa mga pasahero ang pag-adto sa ilang destinasyon. Ang tricycle driver usa ka marangal nga trabaho. Busa, kini nga panginabuhian dili gyud dapat ikaulaw o pagkawala sa kumpyansa sa kaugalingon.

Naa ko kaila usa ka tricycle driver ug ang iyahang asawa nanarbaho sa usa ka ilado ug dakung bangko. Naa pud laing kaila nga company driver ug ang asawa nakahuman sa iyahang graduate studies, taas ang posisyon sa usa ka eskwelahan. Malinawon ang ilang mga pamilya ug tagsa-tagsang pagpamuyo. Naay respeto ug pagpahalaga sa usag-usa. Ang kanindot sa ilang relasyon mao ang ilang pagiging miyembro sa usa ka religious community. Daku kaayo kini nga tabang aron masustener ang ubang mga emotional ug spiritual nilang panginahanglan.

Hinaut unta nga sa inyong pagpamuyo hinumduman nga ang tanan GRASYA sa Ginoo, ug mahimong mapasalamaton kanunay sa Iyaha. Salig lang, kapit gyud sa atong Makagagahum nga Amahan, kauban sa atong Mahal nga Inahan, nga unta hapsay ug layo sa peligro ang tanan. Hatagan unta kamo sa maayong lawas, kusog ug kalig-on aron makapadayon sa pagserbisyo sa pamilya ug sa katilingban. Bilang padre de pamilya, hawak kamay, dalha ang imong kabanay sa inyong altar aron mag-ampo sa dili pa mahuman ang kada adlaw. Remember, THE FAMILY THAT PRAYS TOGETHER STAYS TOGETHER.

God bless you more.
Ate Emz