Hilabihan gayod

Ika-upat nga Domingo sa Kwaresma (March 14, 2021)
2 Chr 36:14-16, 19-23 / Ps 137:1-2, 3, 4-5, 6 / Eph 2:4-10 / Jn 3:14-21

Unsa pa bay gibati nimo nga kulang sa imong kinabuhi karon? Unsa may imo pang gipangita – kabtangan, salapi, maayong panglawas, relasyon, kalampusan, gahum, dungog, ug uban pa? Ayaw kalimot nga hilabihan gayod ang kahingawa, kaluoy ug paghigugma sa Dios nga maoy makatagbaw sa imong pagkulang.

Sa unang pagbasa, bisan pa man sa pag-abuso, pagkamasupilon ug pagpadayon sa mga salawayong buhat sa mga pangulo sa Israel, ang Dios “nagsigig pahimangno kanila pinaagi sa iyang mga alagad, kay nahingawa man siya sa iyang katawhan.” Kitang tanan, panahon niining pandemya nakasinati niini diha sa daghang mga tabang ug grasya nga atong nadawat taliwala sa kalisod. Ang pag-abot sa bakuna pagpadayag unta sa kahingawa nato sa kabililhon sa kinabuhi.

Sa ikaduhang pagbasa, “hilabihan kadako ang kaluoy ug gugma sa Dios alang kanato, nga bisan pa gani sa patay pa kita sa espiritu tungod sa atong pagkadaotan, gibanhaw kita niya uban kang Kristo.” Sa atong giatubang nga krisis karon, buot sa Dios nga maluwas kita sa peligro ug dili kita mangamatay. Nagpadala siyag gikan kanato sa mga tawong naningkamot diha sa siyensiya, panggamhanan ug ekonomiya aron maatiman gayod ang tanan. Ang padayong pagtinabangay nga walay gipaabot nga balos magpakita unta sa kaluoy ug gugma sa usa’g usa.

Sa Ebanghelyo, “gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili mamatay, kondili makabaton hinuon sa kinabuhing dayon.” Sama sa Anak sa Dios, daghan ang nakaamgo nga andam na nga motahan sa ilang kaugalingon sumala sa ilang matampo, sama sa materyal nga tabang, talent, ekipo ug uban pa aron lamang magaanan ang gipas-an sa mga naapektohan. Ang hiniusang lihok sa yanong katawhan, mga frontliners, anaa sa panggamhanan, sa Simbahan ug mga siyentipiko unta magpamatuod sa matuod nga gugma sama sa gugma sa Bugtong Anak.

Kining Kwaresma panahon sa pahimangno sa Dios alang kanato diha sa mga buhat nga giandam sa Simbahan. Siya nagapakita kanato sa kaluoy bisan sa atong mga kakulangan. Siya nagpakamatay kanato aron kita iyang mabawi gikan sa kadautan. Hilabihan gayod ang pagpangga sa Dios kanato.