Birhen sa Lourdes, kadangpan panahon sa pandemya

Bisan sa krisis nga dala sa pandemya, ang Gagmay’ng Kristohanong Katilingban (GKK) Birhen sa Lourdes, Bacahoa, Cabantian nga nahisakop sa Parokya sa St. Mary of the Perpetual Rosary malampusong nagsaulog sa ika-21 ka tuig nga kapistahan sa Birhen sa Lourdes isip patron sa katilingban taliwala niining nasinati nga pandemya.

Nagkahiusa ang mga lumulupyo sa Bacahoa nga saulogon ang kapistahan sa Birhen sa Lourdes kada ika-duhang Sabado sa Pebrero. Karong tuiga gipamalandongan sa mga GKK Servant Leaders ug mga Miyembro sa Katilingban ang usa sa mga hiyas sa Mahal na Birhen nga maoy nahimong tema sa kapistahan nga nagkanayon: “Birhen sa Lourdes maoy sumbanan ug giya sa gasa sa pagka manggihatagon diha sa katilingban sa Dios”.

Tungod sa government health protocols nga dili makapahigayon og Santos nga Misa sa Kapilya gihimo ang maong Santos nga Misa alang sa kapistahan sa Birhen sa Lourdes sa St. Mary Parish Church niadtong Pebrero 13, 2021 sa alas 6:00 sa buntag nga gipangulohan sa parochial vicar, Fr. Rey Sabuero.

Matod pa ni PSL Roy Bong Borillo, hugot kaayo ang iyang pagtahod ug pagtuo sa Mahal na Birhen kay tungod siya ang Inahan sa atong Ginoong Jesukristo nga mao ang “Immaculate Conception”. Pinaagi sa iyang debosyon sa Mahal na Birhen dako kaayo siya og tabang nga nakaapekto sa iyang kinabuhi tungod kay modangop siya kanunay sa Mahal na Birhen aron ipaabot ngadto sa iyang bugtong anak ang iyang mga pangaliya.

Pinaagi sa pag debosyon sa Mahal na Birhen sa mga katawhan nga nahisakop niining GKK nilambo ang maong katilingban: nagmalampuson ang mga proyekto sa kapilya, nagkahiusa ug nagtinabangay ang mga GKK servant leaders ug miyembro ilabina ang pag umol sa mga batan-on nga mo participar ug nahimong aktibo sa mga kalihukan sa GKK ug sa Parokya.

Viva Maria!

(Marriel Siong | St. Mary of the Perpetual Rosary Parish GKK SoCCom)