Balik na ta!

Nagkauban ang mga GKK members sa GKK Sta. Cruz sa ilang kapilya alang sa Kasaulogan sa Pulong (KSP), Sabado March 20, 2021 sa alas sais sa gabii. Isa ka tuig kapin gikan sa last GKK mass nga natambongan sa mga miyembro pagsugod sa lockdown. Wala nakasaulog ang katilingban sa fiesta ug sa uban pang mga naandang kalihukan. Malipayon ang mga dagway sa nanambong tungod kay mibalik na gayud ang KSP.

Ang nakalahi lang karon nga panagtapok mao nga nakaface mask ang tanan, ang Pangulo sa Liturhiya (PSL) naka face shield pa. Adunay foot bath sa entrance ug exit unya distansiya ang paglingkod, anaa ang alcohol sa lamesa para magamit sa paglimpyo sa kamot. Proteksyon kini sa mga nanambong aron dili matakdan sa gikahadlokan nga COVID 19. Maniguro gyud ug sunod aron makapadayon ug tambong sa gibalik nga kalihukan.

Ang pagpangalawat mao ang isa pud sa kabag-ohan karong tuiga. Adunay Lay Minister nga magpakalawat sa mga nanambong. Gitugot kini sa parokya sa Our Mother of Perpetual Help aron kadtong dili makatambong sa misa sa dakong simbahan makadawat na sa maong sakramento. Naobserbahan nga daghan ang mga seniors niadtong gabhiona.

Kung kaniadto kausa lang sa isa ka bulan sila makapangalawat inig-bisita sa mga seminarians, karon mahimo nang kada Sabado nga kasaulogan kay naa na may kalawat hangtud nga mabalik na sa normal ang mga kalihukan sa simbahan kay wala nay pandemic.

Nagapasalamat ang kadaghanan nga mitubag ang simbahan sa mga panginahanglan karon sa katawhan nga mahiduol sa Ginoo pinaagi sa pagpangalawat, sa pagtambong ug zonal mass sa gym kauban ang mga members bisan sa laing GKK. Paningkamot sa matag usa inubanan sa mga pangulo nga masunod ang prescribed protocol aron makalikay sa covid 19 virus.

Panalanginan unta sa Ginoo ang umaabot nga mga kalihukan sama sa Palm Sunday Mass sa March 28, 2021, alas siete y medya sa buntag sa NHA gym, dayon ang Kasaulogan sa Pulong sa Biernes Santo sa alas tres sa hapon sa kapilya, ang Easter Vigil sa Sabado sa alas sais sa gabii sa kapilya ug ang Easter Sunday didto na sa parokya. Mamili ka na lang sa gusto nimong oras nga tambongan sa buntag o sa hapon ba kaha nga misa. Salamat Ginoo sa lain pang higayon nga nagkauban na usab ang mga miyembro sa Kristohanong katilingban. (Marieta V. Comighud | OMPH Bajada)