“Sa Pag-iwas sa Sunog Hindi ka Nag-iisa”: Kooperasyon gipanawagan sa Hepe sa Davao City Fire Bureau

Pinaagi sa Presidential Proclamation No. 115-A, gideklara ang bulan sa Marso isip Fire Prevention Month tungod sa tag-as nga ihap sa mga insidente sa sunog sa tibuok nasud sa bulan sa Marso.

Ang Bureau of Fire Protection, isip mao ang ahensya sa gobyerno nga gimandoan sa paglikay ug pagsumpo sa tanang matang sa makadaot nga mga sunog, sa pag-imbistigar sa mga sunog ug mga hinungdan niini, pag-implementar sa mga balaod kalabot sa sunog, ug ingon man sa pagtubag sa medical nga emerhensiya og serbisyo sa pagluwas og kinabuhi, maghimo ug mga kalihukan alang sa Fire Prevention Month alang sa kaluwasan gikan sa sunog sa mga panimalay pinaagi sa paghatag og mga bag-ong mga programa ug mga kalihukan nga nagtumong sa pagdasig sa publiko nga seryosohon ang kaluwasan ug hatagan kini og igong pagtagad sa tanan.

Mao kini karon ang gihimo nga kampanya sa Bureau of Fire sa syudad sa Dabaw nga gipanguluhan ni Superintendent Alex Pamaybay kinsa miingon nga pinaagi sa pagpasabot ug paghatag og edukasyon ngadto sa publiko, iyang gipanghinaut nga maghimo og mga lakang ang publiko alang sa kaluwasan gikan sa sunog.

Sa programang AMBIT GN sa DXGN 89.9 Spirit FM adlawng Martes, Pebrero 23, 2021, gibutyag ni Supt. Pamaybay nga mikabat na sa 33 ka mga sunog nga nahitabo ug ang upat ka mga dagkong sunog nga nahitabo ning tuiga diin dunay mga kinabuhi nga nakalas, sagad hinungdan mao ang electrical short circuit tungod sa sobra nga gamit sa kuryente.

“Kasagaran sa mga unang giinstalar nga mga wiring sa mga panimalay nagsukad sa gamay pa lamang nga load apan sa dihang nagrasyahan kita, makapalit na ta og dugang nga mga (electrical) appliances apan nagpabilin nga haom lamang sa gamay nga load ang atong wiring sa panimalay,” si Supt. Pamaybay namahayag.

Busa iyang gisugyot sa publiko nga ipa-check ang mga wiring sa mga electrician aron nga katambagan kung gikinahanglan ba usbon ang wiring sa imong balay nga giinstalar sa dugay na nga panahon. Gawas pa niini, dili usab maayo nga mogamit kanunay og mga extension wires.

Siya midugang nga kasagaran usab mas security conscious ang katawhan apan dili safety conscious sa pagtukod sa ilang mga panimalay ug magbutang og mga grills ug mga pultahan nga dili makasulod ang kawatan apan, lisod nga ablihan sa panahon nga emerhensiya. Iya usab nga gisugyot nga magbutang og barrel bolt sa mga grills nga mamahimo lamang maablihan gikan sa sulod.

Kabahin usab sa mga liquefied petroleum gas kon LPG, gisugyot usab ni Supt. Pamaybay nga susihon ang lubot nga bahin sa tangke sa LPG aron nga makita ang manufacturing date ug kung anaa pa ba kini sa luwas nga kahimtang. Mamahimo usab nga timbangon kung ensakto ba ang sulod niini. Hinoon, iyang gipasabot nga dunay naka-instalar nga safety mechanism ang matag tangke apan kinahanglan nga lig-on pa kini ug walay leak.

Hugot usab niya nga gipahimangnoan ang publiko nga magmatngon sa paggamit og butane isip sugnod sa mga portable stove og dili gayud mogamit ug mga refill nga mga nipis nga canister ug LPG sanglit mao kini ang kasagaran nga hinungdan sa pagkasunog.

Samtang sa isyu sa fire extinguisher, si Supt. Pamaybay nagklaro nga gidili gayud sa mga taga Fire Bureau nga morekomendar ug brand o kung asa paliton ang fire extinguisher sanglit ang tanan nga nagabaligya niini, miagi na man sa inspeksyon ug quality standard.

Gihangyo niya ang katawhan sa pagtaho sa ilang buhatan kon ugaling dunay mo-inspeksyon sa mga panimalay nga wala naka uniporme, walay Identification Card, ug walay inspection report, “ayaw pasudla!” si Supt. Pamaybay midugang.