Prosisyon sa Santisimo Sakramento nakapasiga sa pagtoo

Matag Huwebes sa alas 2 sa hapon, malaumon ug malipayon nga nagapaabot ang mga GKK Servant Leaders ug mga miyembro sa St. Mary of the Perpetual Rosary Parish sa pag-agi sa Blessed Sacrament o Santisimo Sakramento. Kini gipanguluhan sa Kura Paroko, Rev. Fr. Dionisio “Diony” C. Tabiliran inubanan sa iyang parish vicar nga si Rev. Fr. Rey T. Sabuero ug sa mga sacristan ug seminarista.

Nagsugod kining maong kalihukan kaniadtong Hulyo 30, 2020 ug kini gisalmotan sa mga parokyano gikan sa nagkalain-laing mga GKK sa St. Mary of the Perpetual Rosary Parish (SMPRP) sa Buhangin.

Sa dili pa moabut ang Blessed Sacrament, ang katawhan maga-ampo sa Santos nga Rosaryo o sa Divine Mercy Chaplet. Nagadagkot usab ug kandila ang mga nagpaabot ug giawhag sa pagluhod isip paghatag ug respeto sa balaan nga lawas ni Kristo.

Gihimo kining pagprusisyon aron padayon nga magkasiga ang kainit sa pagtoo sa mga katawhan taliwala niining pandemya. Kini usab gihimo aron makonsagrar ang mga katilingban nga sakop sa maong parokya.

Matud ni Fr. Diony, kining kalihukan gihimo aron sa simple nga paagi madasig gihapon kita ug dili mawad-an ug paglaum. Dugang pa ni Fr. Diony nga pinaagi sa pagprusisyon, maiway kita sa pagkuyanap sa sakit nga CoVid-19.

Sumala pa sa mga GKK Servant Leaders (GSLs) ug mga Miembro sa mga GKK nga ma-agian sa maong prusisyon makatandog gayud sa kasing-kasing ang gihimo nga prusisyon ug mapasalamaton sila sa atong mga kaparian nga maoy nangulo niini.

Dugang pa nila nga ila gayud nga mabati ang kaayo ug gugma sa atong Ginoo ug nakatagamtam sila ug kalinaw sa matag pagduaw sa Blessed Sacrament.

Sa kasamtangan, padayon ang maong prosisyon dinhi sa parokya sa SMPRP ug nagkadaghan na usab ang ihap sa mga nagpaabot. Kanunay usab nga gipahimangnuan ang mga parokyano sa pagsunod sa mga health protocols nga ginapatuman sa atong gobyerno sama sa pagsuot sa face masks, face shields, paghugas sa kamot gamit ang sabon ug alcohol ug pagsunod sa social distancing. (Allyza Hope Tabigue | St. Mary of the Perpetual Rosary Parish GKK SoCCom)