Pasilidad sa pagbakuna batok COVID-19 sa SPMC andam na

Malampuson ang pagbisita nila Secretary of Health Francisco Duque III, Secretary Carlito Galvez, Jr., Chief Implementer of the National Task Force against COVID 19, ug Cabinet Secretary Carlo Nograles sa Southern Philippines Medical Center niadtong milabay nga Martes, Pebrero 16, 2021.

Ang ilang paglili o walk through sa maong mga gamit ug lugar sa naasoy nga hospital kabahin sa pagpangandam sa pagsugod sa dili madugay sa pagbakuna batok sa COVID 19. Gisuta kon unsa kaandam ug unsaon ang pagpahigayon niini sa maong balay-tambalanan.

Dako ang kalipay ni Dr. Audan sa makahihilap o impressive nga pagpangandam sa maong hospital. Si Dr. Audan mapasalamaton sa pag-ingon nga ang pagbisita sa mga kadagkoan, “was a big, big success. Impressed na impressed po sila.”

Ang maong pagbisita nagpadayag sa seryoso nga paningkamot sa panggamhanan ug lumilihok sa pag-atiman sa maayong panglawas aron masugpo ang kapiligro ug kakuyaw nga dala niining maong sakit. Gisugdan na ang pagpalista sa mga modawat sa maong bakuna gikan sa mga front liners ug bisan gani sa mga buot nga magpabakuna kutob sa makaya sa maong gipalit nga bakuna.

Sa miaging semana, giawhag sa Arsobispo sa Davao ug CBCP President, Archbishop Romulo G. Valles, D.D., nga mamahimong gamiton ang mga pasilidad sa Simbahan kung kini gikinahanglan ug makatabang.

Sa pagsaysay ni Dr. Ricardo Audan, ang kasamtangang OIC Medical Center Chief, moabot na ang mga bakuna ug posibleng masugdan na dayon sa katapusan niining bulan sa Pebrero.