Nag-ayo, nagpahimangno, nagpabilin

Ika-6 nga Domingo sa Tuig (February 14, 2021)
Lev. 13:1-2, 44-46 / Sal. 32:1-2, 5, 11 / 1 Cor. 10:31-11:1 / Mk. 1:40-45

Daghan kanato karon daw mga sanlahon tungod kay ang matag usa giawhag sa paglikay sa pagpaduol sa usa’g usa. Mahadlok kita nga matakdan ug makatakod. Sa mga pagbasa, si Hesus nag-ayo, nagpahimangno ug nagpabilin.

Nag-ayo si Hesus sa masakiton. Sa paghangyo nga puno sa pagtoo sa usa ka sanlahon nga ayuhon siya ni Hesus, giayo ni Hesus ang sanlahon. Iyang kabubot-on nga ang nahugaw mahinlo, ang nahilayo mahaduol, ang nahisalaag makaplagan ug ang nakasala mapasaylo. Sa iyang pag-ayo sa sanlahon iyang gipakita nga ang Dios naghinlo sa atong sala, nagpasaylo kanila nga moduol kaniya. Sama sa gitubag nato sa Salmo, luwason kita sa Dios kung kita mosangpit kaniya. Atong iampo nga ayuhon ang tibuok kalibutan niinng COVID 19 nga atong giatubang.

Nagpahimangno si Hesus sa sanlahon. Giingnan ni Hesus ang naayo nga sanlahon nga dili manugilon, kondili maodto sa pari ug maghalad. Kining pahimangno wala mapakyas sa dihang nanugilon hinuon ang naayo nga sanlahon, kondili nagpadayag kini nga dili gayod mapugngan ang kaayo sa Ginoo nga masinati sa tawo. Sa higayon nga ang tawo makahimamat sa tinuoray sa gugma sa Dios kini mokaylap gayod. Mao nga si San Pablo nagpahinumdom usab sa mga taga Corinto diha sa ikaduhang pagbasa nga kanang maong kaayo ipakita sa maayong pagtagad sa usa’g usa nga walay paghuna-huna sa kaugalingon lamang, kondili ang kaluwasan sa tanan. Mahimamat unta nato ang Dios nga kanunay nag-ayo kanato aron ang iyang gugma sa kanunay atong imantala.

Nagpabilin si Hesus sa lugar nga awaaw. Kini human nga siya nailhan na sa kadaghanan, siya wala na nakapasayasaya bisan asa. Kining iyang pagpabilin sa lugar nga awaaw dili kini paglikay sa pagtabang sa nanginahanglan o pagpalayo sa mga moduol kaniya. Kini nagpasabot lamang nga buot ni Hesus nga kanunay siyang makauban ug dili maputol sa relasyon sa tinubdan sa gahum ug hinungdan sa iyang misyon. Kana mao ang pagpakig-uban sa Amahan diha sa kanunay nga pag-ampo aron dili siya malumos sa daghang buluhaton, kondili kanunay malagsik sa presensiya sa nagpadala kaniya. Hinaut nga ang kaawaaw nga dala niining pandemya maghatod kanato sa mas maampuon nga kinabuhi.

Manghinaot kita nga si Hesus mag-ayo sa tanan natong kahuyang ug kahadlok. Hinaut nga ang iyang pahimangno maglig-on kanato nga mga magsasangyaw sa iyang kaayo pinaagi sa atong mga pulong ug buhat. Hinaut unta nga magpabilin kita nga mahiusa sa Dios sa kanunay ilabina sa panahon sa pagsulay.