Kalingkawasan sa pagkagapos

Ika-duhang Domingo sa Kwaresma (February 28, 2021)
Gn 22:1-2, 9, 10-13, 15-18 | Ps 116:10, 15, 16-17, 18-19 | Rom 8:31-34 | Mk 9:2-10

Unsa bay nakagapos kanimo? Relasyon ba, bahandi, hitabo, lugar, kasinatian o tawo? Dakong posibilidad kanato nga mahigtan kita niining maong mga riyalidad sa atong kinabuhi. Usahay maglisod kita pagbuhi sa usa ka relasyon, bahandi, hitabo, lugar, kasinatian o tawo nga angay buhian sa atong kinabuhi.

Sa unang pagbasa, dayag ang pagbuhi ni Abraham sa iyang anak nga si Isaac sa dihang gipangayo sa Ginoo nga kini iyang ihalad ngadto kaniya. Wala nagpanuko si Abraham bisan gani sa pagpatay niini kung kini iya man nga kabubot-on sa Dios. Daw lisod kini huna-hunaon, apan nagpadayag kini sa dakong pagsalig ug pagtahan nga puno sa pagtuo.

Sa ikaduhang pagbasa, ang Ginoo mismo walay pagpugong nga ang iyang Bugtong Anak nga si Hesus, iya usab nga ihalad isip sakripisyo alang sa tanang katawhan. Bisan sa pagkawalay sala sa iyang Anak, si Hesus maoy nagpakamatay aron ang katawhan nga nakasala maluwas. Kini pagpakita unsa gayod kadako ang pagmahal sa Dios sa matag usa kanato nga hilabihan kita kaimportante nga pakamatyan gayod niya.

Sa Ebanghelyo, gitudloan ni Hesus ang iyang mga tinun-an unsaon pagbuhi sa mga maanindot nga mga kasinatian ug lugar. Bisan unsa man nga malipayon, lamian ug maayo nga hitabo sa atong kinabuhi, mahimo kining buhian aron kita makapadayon sa mas labi pang importante ug bililhon nga tawag sa pagsangyaw sa Maayong Balita. Giawhag ni Hesus ang iyang mga tinun-an nga dili magpadala ug magpahigot sa ilang nakita kay kini hulagway ug pagtilaw lamang sa ilang walay sukod nga himaya kung ilang mabuhat ug mapuy-an ang tawag ug misyon sa pagmantala sa Maayong Balita.

Niining panahon sa Kwaresma, andam ka ba nga malingkawas sa imong gituohan nga mga importante apan lumalabay nga mga butang o kasinatian aron mahatagan nimo og luna ang Dios sa imong kinabuhi? Andam ka ba nga mobuhi sa tanang makababag kanimo aron ang Dios sa tiunay mopuyo diha kanimo? Andam ka ba nga malingkawas sa tanan aron gawasnon ka nga magkinabuhi isip sumusunod ni Kristo?