Dili na laglagon ang katawhan

Unang Domingo sa Kwaresma (February 21, 2021)
Gen. 9:8-15 / Sal. 26 / 1 Ped. 3:18-22 / Mk. 1:12-15

Unang Domingo na sa Kwaresma ug ania gihapon kita sa kapanahunan sa pandemya. Ang pag-abot niining pandemya daw kasinatian sa kalaglagan. Nalaglag ang katawhan sa naandang gawasnon nga kalihukan kay nausab ang dagan sa kalibotan. Nalaglag ang kahimtang sa uban tungod kay nawad-an sa kapaninguhaan. Apan taliwala niini, atong makit-an ang mahigugmaong kamot sa Dios nga nag-agak ug nag-atiman kanato kanunay.

Mao kini ang gisaad sa Ginoo diha sa unang pagbasa. Dili na niya laglagon ang tawo ug ang tanan niyang binuhat sa kalibotan. Maghimo na siya’g kasabotan sa iyang dakong gugma ug pagtagad sa katawhan nga nagbasol ug nagbag-o. Hinloan na niya ang mga sala nga nahimo sa tawo. Nahinloan ka ba sa imong garbo ug mga dautang mga tinguha human mo nasinati kining maong krisis?

Kining maong paghinlo nahimo diha sa pag-antus ni Hesukristo alang sa tanan. Maayo ka man o dautan nga tawo, ikaw gipakamatyan sa Dios tungod sa naghingapin niyang gugma. Ang iyang pag-antus ug kamatayon walay pagpihig, kondili alang sa tanan. Nabati mo ba nga bisan gani ang hulga sa COVID 19 walay pagpili, himsog man ang panglawas o dili?

Dili na kita malaglag tungod kay gidaug na ni Kristo ang kadautan sa sala. Wala nay gahum ang yawa diha kaniya. Ang kalibotan nga naulipon sa kasaypanan, iya nang gibaw pag-usab sa kaulipnan ni Satanas. Wala makalabaw ang pagtintal kaniya kay siya nagpabilin nga malahutayon ug matinud-anon sa kanunay. Naamguhan mo ba nga kung lig-on ka lang mohupot sa mga butang espirituhanon walay kaluya nga makadaug kanimo?

Wala gayoy makalaglag sa tawo nga masinugtanon ug matinud-anon sa kasabotan sa Dios. Ang tawo nga masinugtanon sa Ginoo dili basta-basta matarog sa bisan unsang pagsulay. Siya nga matinud-anon kanunay nga hinlo ang konsensiya ug binuhatan taliwala sa mga tentasyon. Siya nga makanunayon sa pagtuman sa kasabotan sa Dios, molahutay sa kinabuhing balaan ug dili malaglag bisan unsa man ang modangat kaniya. Tubagon unta nato ang makaluwas nga kalig-on sa Ginoo sa matuod nga kinabuhing nabag-o.