“Buhay at Pamilya: Sandigan sa Panahon ng Pandemya”

Matag tuig atong gisaulog sa bulan sa Pebrero ang “Pro-Life Month”, usa ka kasaulogan nga nagpahinumdom kanato sa kasagrado sa kinabuhi gikan sa sabakan hangtod sa iyang natural nga kamatayon. Kini usab nag-awhag kanatong tanan ilabina kita nga mga kristiyanos sa pag-amping sa kinabuhi nga gipahulam kanato sa Dios nga Magbubuhat.

Sa atong pagsaulog sa Pro-Life Month niining panahon sa pandemya unsa man ang mga kalihukan diri sa Archdiocese sa Davao? Niadtong milabay nga Enero 28 (Huwebes) sa gabii adunay gipahagayon nga “virtual meeting” ang Family and Life Apostolate Coordinators and Core Group gikan sa mga lain-laing mga parokya sa Davao aron sa pagplano sa mga posibleng mga bulahaton.

Nagkauyon ang mga pangulo sa Family and Life Apostolate nga ang mga kalihukan niining bulan sa pagsaulog sa kinabuhi mao kining mosunod:

1. Una, magbutang ug Tarpaulin sa matag parokya nga adunay Tema: “Buhay at Pamilya: Sandigan sa Panahon ng Pandemya” aron mahibalo ang katawhan nga nagsaulog kita isip usa ka Simbahan diri sa Archdiocese sa Davao niining bulan sa paghandom sa kasagrado sa kinabuhi bisan pa panahon sa pandemya.
2. Ikaduha, giduso usab sa mga pangulo nga adunay pagahimoon nga pagpanalangin sa mga Buntis o “blessings of pregnant women” panahon sa Santos nga Misa isip pagpadayag sa atong pag-ila ug pag-amuma sa kinabuhi nga gasa sa Dios sa matag pamilya sugod diha sa sabakan sa inahan.
3. Ikatulo, giawhag usab nga himoon ang pag bendisyon sa lubong sa mga wala natawo nga mga bata o “blessings of the tombs of the unborn” ilabina niadtong mga parokya nga anaa niini, simbolo sa paghandum nato sa kangil-ad sa aborsyon o ang paglaglag sa kinabuhi diha sa sabakan sa inahan.
4. Ikaupat, himoon usab ang pag ampo sa Santos nga Rosaryo sa Kinabuhi o “Rosary for Life” sa dili pa ang Santos nga Misa aron ang mga katawhan nga manambong sa Santos nga Misa maka-ampo usab alang sa kinabuhi, uban ni Birhen Maria ang Inahan nga nagpahimugso diri sa kalibutan sa Dios sa kinabuhi, nga mao ang atong Ginoong Hesurkisto.
5. Ikalima, adunay pagahimoon nga “virtual conference” si Doktora Eleanor “Baby” Palabyab, isa sa mga Founders sa Doctors for Life Philippines, nga taga Davao ug naghimo sa iyang trabaho isip usa ka Doktor diha sa San Pedro Hospital. Iyang pagahisgutan karong umaabot nga Pebrero 7 ug 14, adlaw nga Domingo, sa alas 7:00-8:00 sa gabii gamit ang atong Catholic Radio Station sa Davao ang DXGN 89.9 SPIRIT FM, aron iyang hisgutan ang relasyon sa pag-amuma sa kinabuhi niining panahon sa pandemya.

Hinaot nga makasalmot ug makaapil kitang tanan niining mga kalihukan aron madugangan ang atong kahibalo ug kaamgohan sa ka-bililhon sa kinabuhi isip gasa sa Dios sa matag usa kanato. (Fr. Orlando Angelia | Family and Life Director)