Ayaw pagbaton og laing dios gawas kanako

Ika-tulong Domingo sa Kwaresma (March 7, 2021)
Ex 20:1-17 or Ex 20:1-3, 7-8, 12-17 / Ps. 19:8, 9, 10, 11 / 1 Cor 1:22-25 / Jn 2:13-25

Niining panahon sa pandemya, kinsa ba ang naghatag nato’g kinabuhi? Unsa ba ang atong gisunod nga mga paagi sa panghuna-huna? Unsa ba nga mga pagtulon-an ang atong gipuy-an?

Sa unang pagbasa, ang Ginoo nagpahimangno nga dili kita magbaton og laing dios gawas kaniya, nga dili nato gamiton ang iyang ngalan sa dautang tuyo. Kung ang atong Dios mao gayod si Hesukristo, walay lain natong saligan ug kadanggpan sa tanang panahon, bisan sa kalisod kung dili mao ang pagtulon-an ni Kristo. Duna bay laing gamhanan ug gisaligan nimo nga labaw pa kay Kristo niining panahon sa pagsulay?

Sa salmo, kita gipahimangnuan nga ang Ginoo nagbaton sa mga pulong sa kinabuhing dayon. Ang iyang balaod hingpit ug naghupay sa kalag. Ang iyang kasugoan kasaligan ug nagalipay sa kasing-kasing. Gisunod ug gipuy-an mo ba ang mga sugo ug pagtulon-an ni Kristo panahon sa kaharuhay ug kalisod?

Sa ikaduhang pagbasa, si San Pablo nagsangyaw nga si Kristo mao ang gahom ug kaalam sa Dios nga gipangita apan wala hiilhi sa mga Judio ug mga Griyego. Si Kristo ang giisip nga binuang, nga puno sa kaalam, ang kahuyang nga puno sa kalig-on. Nakakaplag ka ba og kalig-on ug kaalam diha kang Kristo bisan dili mo masabtan ang kahimtang sa kinabuhi tungod sa kapait nga dala niining pandemya?

Sa Ebanghelyo, si Kristo nagbuyag sa mga naghimog merkado sa balay sa iyang Amahan. Iyang gibadlong ang nahisalaag sa matuod nga katuyoan sa tinuod nga pagsimba. Iyang gipaamgo silang mga namintaha sa pagbalik sa hustong pagrespeto ug pagpangga sa isigkatawo. Wala gayoy angay nga usa ka tawo nga maniguro lamang sa kaugalingon, kondili maglantaw unta sa kaayohan sa tanan. Nabati mo ba nga ang pagsunod sa mga health protocols ug pagpangandam sa bakuna alang kanatong tanan, kabahin sa pagpadayag sa pagrespeto ug pagpangga sa usa’g usa?

Kining panahon sa kwaresma, dakong hagit kanato ang pagpalalom sa pag-ila sa atong mahigugmaon nga Dios nga nagapasaylo kanato. Siya ang bugtong natong Dios sa tanang panahon. Sobra pa siya sa bakuna nga atong gikinahanglan. Wala nay laing Dios gawas kaniya.