Abo, ibolibod sa Miyerkules sa Badlis: Matag pamilya mahimong mag-andam niini

Taliwala sa kalisod nga dala sa pandemya, andam na ang mga parokya ug katawhan sa pagsaulog sa Miyerkules sa Badlis karong umaabot nga Pebrero 17.

Sa gipagula nga Pastoral Advisory number 1, series of 2021, niadtong Pebrero 8, si Arsobispo Romulo Valles, D.D., Obispo sa Davao ug CBCP President, naghatag og gibug-aton sa rito sa ipahigayon nga badlis tungod kay dili na ibadlis sa agtang ang abo sama sa naandan, kondili ibolibod lamang ang uga nga abo sa ulo.

Human sa panalangin sa pag-ampo alang sa abo, ang pari mosulti og kausa lamang alang sa tanan sa gitawag nga formula, “Repent and believe in the Gospel” ug mohatag na sa abo uban sa kaabag nga mga ministro aron paghatag sa abo pinaagi sa pagbolibod sa ulo.

Alang sa mga dili gayod makasimba tungod sa direktiba sa atong panggamhanan sama sa edad ug kahimtang sa panglawas, mamahimo nga ang usa ka miyembro sa pamilya nga nakasimba maoy mangayo sa abo nga ibutang sa limpyo ug maayong sudlanan aron siya maoy mobolibod gamit ang formula pag-abot sa ilang panimalay.

Kini kinahanglan nga i-organisa sa mga parokya. Gani, gisugyot usab sa CBCP nga mamahimo usab nga himoon sa tagsa-tagsa ka pamilya ang pagsunog sa lukay isip pag-andam sa abo ug sa pagbolibod niini. Gipadala uban sa maong Pastoral Advisory ang angay nga himoon nga rito.

Kining maong pag-andam sa abo ug pagbolibod diha sa panimalay gisugyot sa kadagkoan sa liturhiya diha sa atong simbahan aron kadtong mga gidid-an sa pag-gawas sa panimalay tungod sa edad ug ubang rason nga dili na makasimba, makahimo gihapon sa pagbansay sa Kwaresma pinaagi sa pag-abli niini sa gitawag nga Miyerkules sa Badlis.

Gihimangnoan pag-usab sa tanan sa pagsunod sa mga protocols, sama sa face mask ug face shield, social distancing, markers for seats, seating arrangement, ug QR code, thermal scanners, footbath ug hand sanitizers sa mga entrance ug exits sa mga simbahan.

Siya mipahimangno nga walay prosisyon nga himoon sa paghalad sa mga gasa, walay Holy Water fonts sa mga pultahan sa simbahan ug likayan una ang pagkanta sa mga tawo gawas lang sa usa ka cantor. Gidasig usab niya nga magpadayon ang mga volunteers sama sa ushers, EMHCs. Kung mahimo, gamiton usab ang mga parking lots aron makatabang sa social distancing.

Mahimo nga kining maong mga giya gikan sa atong mahal nga Obispo madugangan pa sa umaabot nga mga adlaw. Gipanghinaut nga tabangan kita sa Mahal nga Inahan sa Kanunay nga Panabang niining panahon sa kalisdanan. (DCH)