500 Ka tuig sa pagka-Kristiyano maoy payong sa mga kalihukan

Sa gipahigayon nga gipalapad nga tigom birtuwal sa Archdiocesan Pastoral Council sa Arkidyosis sa Davao uban ang mga Kura Paroko, gilatid nga daghang mga mahimong unod sa mga kalihukan sa Simbahan niining tuiga.

Gipasabot ni Arsobispo sa Davao ug CBCP President nga “ang 500 ka tuig sa pagka-Kristiyano sa Pilipinas maoy magsilbing daw payong sa tanan.”

“Ang pagkasentro sa pagkahimong mga binunyagan isip mga magtotoo ni Kristo 500 na ang milabay maoy pinakasentro sa tanang mga kalihukan niining tuig 2021 hangtod Abril 18, 2022,” dugang niya.

Ang paghandum sa unang Misa sa Pilipinas pagasaulogon karong Abril 4, 2021. Kini giatol sa malipayong kasaulogan sa Pasko sa Pagkabanhaw sa atong Ginoo nga maoy okasyon niadtong milabay nga 500 na katuig. Dili kini mismo ang tukmang petsa. Napamalandungan sa mga kaobispohan sa Pilipinas nga mas importante nga itunong kini atol sa kasaulogan ug dili lamang sa tukmang petsa niadtong higayona nga mao ang pagkabanhaw sa Ginoo.

Matapos kining hubileyo sa pagka-Kristiyano sa Pilipinas sa umaabot nga Abril 18, 2022. Sulod niining maong tuig ang mga kalihukan maglangkob sa pagduso sa pagpasabot ug pagsugod sa pagkapiniyalan isip mga Kristiyano nga gigasahan aron kita mohatag, gifted to give. Kini ang tawag sa paghatag sa atong kaakuhan sa pagsuporta nga pinansiyal sa Simbahan. Dugang kining ipasabot sa mga umaabot nga adlaw.

Sulod niining tuiga ang paghagit sa matag usa nga makaamgo ug mapuy-an ang pagka-misyonero. Human nga ang Simbahang Pilipinhon nakabenepisyo sa mga buhat sa mga misyonerong langyaw, karon na usab ang panahon nga ang mga Pilipino magpadayon nga mosabwag sa pagtoong Kristiyano sa tanang dapit sa kalibotan. Pagahimuon ang kongreso o tigum alang sa misyon sulod niining tuiga.

Daghan usab ang mga pagahimuon nga online nga paghandum ug pagpasabot sa mga importanteng hitabo, petsa, tawo ug butang sa kasaysayan. Adunay komisyon sa mga kaobispohan nga gitahasan sa paghimo niini alang sa atong kasayuran.

Lakip niining tuiga ang pagsaulog usab sa Tuig ni San Jose nga bana ni Maria ug Patron sa mga mamumuo. Si Santo Papa Francisco sa natad nga kalibotanon maoy nagdeklara niini. Panahon kini nga mapamalandungan ang iyang pagkaginasahan ug misyonero sa iyang paagi. Ang Parokya sa St. Joseph sa Sasa uban kang Fr. Bong Dublan nga ilang Kura Paroko maoy gitahasan nga manguna niining maong kalihukan.

Gihatagan usab og duso ni Santo Papa Francisco ang adlaw sa mga apohan sa umaabot nga bulan sa Hulyo. Iya usab nga giawhag ang tibuok Simbahan nga mamalandong sa kaimportante sa paghigugmaay ug kalipay diha sa pamilya. Ang sukaranan niining maong pamalandong mao ang Amoris Laetitia.

Gihagit ang matag parokya sa mamugnaong mga kalihukan sa pagpahitabo niini. Gilauman nga magpadayon ang pagpatakdo niini sa matag usa isip sakop sa Arkidyosis.