33-day Consecration to St. Joseph

Kabahin sa gideklara karong tuiga is Jubilee Year of St. Joseph, nagpahigayon ang St. Joseph Parish, Sasa, sa unang pundok sa mga deboto ni San Jose aron mangandam sulod sa 33 ka adlaw nga pag-ampo alang sa konsagrasyon ngadto kang San Jose.

Gisugdan kini niadtong Pebrero 15 ug matapos sa Marso 19 atol sa kapistahan ni San Jose nga Bana ni Maria isip secondary patron sa maong parokya. Nianang higayuna gipaabot nga ang mga 225 ka mga deboto mohimo sa ilang pagkonsagrar ngadto kang San Jose.

Gipaabot usab nga human niining Marso 19 pagahimuon ang ika duhang batch sa 33 days consecration to St. Joseph.

Sa pagsulat niini, Pebrero 23, maoy ika-siyam ka adlaw sa pag-ampo. Ang paagi sa pag-ampo niini gihimo human sa 6:30 sa buntag nga Live stream Mass ug aduna usab sa alas 7:00 sa gabii sa virtual nga paagi.

Ang matag adlaw nga pag-ampo naghatag kini sa usa ka espirituhanon nga pagpanaw ngadto sa pagpamalandong sa mga bertudes nga iyang naangkon. Adunay katingad-an nga kasinatian nga bation mo nga naa siya, kabahin siya sa atong kinabuhi. Ang basahon dali ra masabtan ug ang estilo sa panagsultianay nagpahibalo, nagtudlo ug nagdala sa usa ka lawom nga pag-ampo, kauban si San Jose ug modala kanato ngadto sa pagkasuod ni Jesus ug ni Mama Mary.

Daghan ang naningkamut kutob sa mahimo aron paghuman niini nga 33 ka adlaw ug sa katapusan makaawat ug mapuy-an ang sama sa kinaiya ni San Jose.

Daghan usab ang nagpasalamat kaayo sa Kura Paroko nga si Fr. Bong Dublan nga nahimo kining maong giya sa pag-ampo sa porma sa usa ka booklet.

Gikuha kini sa orihinal nga giya sa pag-ampo nga gihan-ay ni Fr. Donald Calloway aron sayon ang atong pag-tuon ug mahibaloan ang mga tahas ni San Jose ngadto sa mga pamilya uban sa pagdeboto usab kang Mama Maria. Kini alang sa tanan, batan-on man ug mga hamtong.

Ang St. Joseph Parish usab sa umaabot nga Pebrero 28, Domingo, abli na nga moabi-abi niadtong mga buot moduaw kang San Jose. Sumala sa gideklara sa atong Arsobishpo sa Davao nga ang maong dapit usa na na Pilgrim Church of St. Joseph. (Amie Desquitado | SocCom)