Unsay angay nga kagul-an?

Naguol ka ba kay ang pulong sa Ginoo wala nimo nasabtan? O naguol ka ba kay ang pulong sa Ginoo wala nimo napuy-an?

Isip pagsaulog sa Nasudnong Adlaw sa Bibliya dinhi sa Pilipinas matag kataposang Lunes sa Enero, gipalawman ni Pastor Haniel Taganas, sa United Church of Christ in the Philippines, ang kahulogan sa tema niining tuiga.

Sa tema nga The Word of God Restores, si Pastor Haniel mipaambit atol sa programang Giya sa Pagtoo sa DXGN 89.9 Spirit FM nga gidumala sa Archdiocesan Bible Apostolate of Davao (ABAD) niadtong milabay nga Lunes, Enero 25.

Alang kang Pastor Haniel “kung duna may ihiuli, dunay naguba o nawala, kung duna may angay nga ihiuli kana mao ang kinaubuhi nga nawala ug naguba ni Satanas tungod sa sala. Tungod sa sala kita namatay.” Apan bisan pag nawala ang atong kinabuhi, angay kitang magmalaumon ug mapasalamaton.

“Magpasalamat kita sa Dios nga dunay pasalig kanato nga kining kinabuhi, iya gyung ibalik kanato. iya kitang i-restore. Gani mao man nay iyang tuyo sa pag-anhi,” pamalandong ni Pastor Haniel.

Ang pagadapit ni Pastor Haniel nga molingkod nga molingkod atol sa ilang senimana nga programa kabahin usab sa pagsaulog sa National Bible Month sa tibuok bulan sa Enero ug Week of Prayer for Christian Unity nga gitapos niadto gayong adlawa.

Nalipay usab si Pastor Haniel nga siya gihatagag higayon isip usa ka Pastor sa UCCP nga makapaambit sa pulong sa Ginoo sa DXGN 89.9 Spirit FM. Alang kaniya, kini usa ka pagpadayag sa bunga ug padayong paningkamot sa tinuod nga panaghiusa sa tanang mga Kristiyanos dinhi Davao.

Kahinumdoman nga gideklara ni Presidente Rodrigo Duterte pinaagi sa Republic Act 11163 nga usa ka Special Working Holiday ang kataposang Lunes sa Enero matag tuig isip pagsaulog sa National Bible Day. Kini gipirmahan ni Presidente Duterte niadtong Disyembre 20, 2018.

Gihagit ni Pastor Haniel ang tanan sa dili pagkasubo kung dili gilayon nato masabtan ang pulong sa Ginoo, kondili ang importante nga mapuy-an hinuon kini. Iyang gitak-op ang iyang pagpaambit pinaagi sa pagsubli sa gisulti ni Mark Twain, “Do not worry about the things you do not understand. Worry about the things you understand and yet failed to do.”

Busa ayaw kaguol kung ang pulong sa Ginoo wala nimo nasabtan. Mas angay kang maguol sa mga butang nga imong nasabtan apan wala nimo buhata. (dcherald)