“TOK-HANG” gihimo sa Davao Light

Dugang pagsinabtanay ug kooperasyon ang gihangyo karon sa Davao Light and Power Company ngadto sa mga konsumante kabahin sa mga reklamo sa electric bill.

Mao kini ang gipalanog nga panawagan sa power service provider sa Davao pinaagi sa spokesperson nga si Mr. Fermin Edillon atol sa pakighinabi sa programang AMBIT GN sa DXGN 89.9 Spirit FM, adlawng Miyerkules, Enero 27, 2021.

Unang gipasabot ni Mr. Edillon nga gihatagan og lugway sa kompanya ang pagpaningil sa bayronon sa kuryente sukad sa pagdeklara sa ECQ hangtod sa bulan sa Disyembre.

“Sukad nga nagsugod ang pandemiya, kung wa ako masayop sa bulan sa Abril, hangtod December, wala jud na namutol,” si Edillon midugang. Apan nagpahigayon sila sa gitawag nga TOKHANG kon pagpan-tokTOK ug HANGyo sa mga konsumante ilabi kadtong dagko ug mga bayronon sa pag-settle sa ilang mga bayronon sa koryente.

Gipasabot usab ni Edillon nga nanghulam ang Davao Light og pundo gikan sa bangko aron lamang nga makasustenir sa pagserbisyo sa kuryente taliwala sa menos nga koleksyon sanglit dunay mga bayrnonon ang kompaniya sa tinubdan sa kuryente nga gibutang dinha sa electric bill.

Hinoon, iyang gipasabot nga nahuman na ang grace period nga gihatag sa kompaniya sa mga konsumante nga i-settle kon bayran ang ilang mga na-konsumo nga kuryente kutob sa bulan sa Disyembre isip pagtuman sa kamanduan sa Energy Regulation Commission nga hatagan ug lugway ang mga konsumante sa pagbayad sa electric bill panahon sa ECQ kon Enhanced Community Quarantine.

Sa katapusan, gihangyo ni Edillon ang tanan nga mobisita sa ilang mga buhatan sa Matina o sa Victoria Plaza aron sa pagpakigsabot kalabot sa ilang bayronon sa kuryente o dili ba kaha sa pagpadala ug private message sa ilang facebook page sa Davao Light and Power Company. https://www.facebook.com/DavaoLightOfficial, email: davaolight@aboitiz.com o bisitahon ang ilang webpage: http://www.davaolight.com/