Sila gidapit, mibiya ug misunod

Ika-3 nga Domingo sa Ordinaryong Panahon (January 24, 2021)
Jon. 3:1-5, 10 / Sal. 25:4-9 / 1 Cor. 7:29-31 / Mk. 1:14-20

Sa tanang higayon aduna gayoy modapit kanato aron ato nga maangkon ang kuno unsay makaayo kanato. Kini atong masaksihan bisan diha sa mga advertisement sa media. Makadesisyon dayon kita sa paghupot sa unsay atong gituohan nga mas makaayo kanato. Sa mga pagbasa karon, anaa ang pagdapit, pagbiya ug pagsunod.

Sama sa pagdapit sa Ginoo kang Jonas sa unang pagbasa, ang mga tinun-an nga si Simon, Andres, Juan ug Santiago gidapit usab ni Hesus sa pagsunod kaniya. Nagpasaabot kini nga walay usa kanato nga mopresentar lamang sa kaugalingon nga wala gitawag. Matag usa gidapit gayod, labina tungod sa atong pag-amti sa bunyag ni Kristo nga mamahimong iyang mgasasangyaw. Namati ka ba ug namalandong nga ikaw usab gidapit aron mamahimong katekista o alagad, responsable nga ginikanan o matinud-anon nga politiko, kasaligan nga trabahante o kugihan nga mamumuo?

Gibiyaan gilayon ni Jonas ang iyang lungsod ug sa mga unsang tinun-an ug apostoles ni Kristo ang ilang mga naandang trabaho sa pagkamananagat aron sila mamahimong managat og tawo. Wala sila naglangan sa paghimo sa gipabuhat sa Ginoo kanila. Wala sila nagduha-duha sa bag-ong klase sa pamuyo nga ilang dawaton. Wala sila nahinugon sa naandan nilang gimbuhaton. Ikaw, unsa kaha ang pwede mong biyaan nga naandan nga buluhaton aron mas makapakaylap ka pa sa kaayo sa Ginoo bisan niining pandemya? Andam ka ba nga biyaan ang naandang kaharuhay aron makapaambit pa sa uban ang imong grasya labina sa mas nanginahanglan karon?

Misunod dayon si Jonas ug ang mga unang tinun-an ni Hesus aron ilang mapuy-an ang gisulti ni Hesus alang kanila. Sila misunod dayon aron mapahitabo ang pagsaksi alang sa tanang katawhan. Sila nahimong kabulig ni sa Ginoo aron mapaabot sa tanan ang kaayo ug gugma sa Dios. Wala na sila nagsayang og panahon aron himuon ang angay. Sa imong kahimtang karon, unsa pa may imong gipaabot aron nga mapakita nimo nga ikaw tiunay nga magtotoo ni Kristo? Unsaon man nimo pagpakita sa tinuoray gayod nga pagkasumusunod ni Kristo?

Kining pagdapit sa Dios mao gayoy makaluwas kanato. Mobiya unta kita sa unsay makababag kanato paduol sa iyang gingharian. Makasunod unta kita sa iyang pamaagi sa pagkinabuhi alang sa hingpit nga kalingkawasan.