“Pabahaon ta ang pulong sa Ginoo”

Dinasig sa Archdiocesan Bible Apostolate of Davao (ABAD), giawhag ang tanang apostolado sa Bibliya sa tibuok Arkidyosis sa Davao nga pabahaon sa pulong sa Ginoo ang gitawag nato’g virtual world.

Kini ang tubag sa Episcopal Commission on Biblical Apostolate (ECBA) sa Catholic Bishops’ Conference of the Philippines nga subay sa tema sa National Bible Month nga “Ang pulong sa Ginoo mopahiuli”. Gihagit ang tanan nga imantala ang makaayo, makapahiusa ug makapabag-o nga gahum sa pulong sa Dios.

Gilauman ang mga naandang kalihukan sa matag parokya ug Gagmay’ng Kristohanong Katilingban, sama sa Pagbalaan sa Bibliya kon Bible enthronement, Bible sharing, Bible symposium, Bible quiz, poster making contest ug uban pa. Apan niining higayona, kasagaran niini pagahimuon pinaagi sa social media kon birtuwal.

Gidapit sa ABAD isip pag-alayon sa ECBA ang tanang apostolado sa Bibliya nga mosalmot sa Bible Fest 2021 karong Enero 23-24, usa ka Ecumenical nga kasaulogan ug online gathering.

Giawhag ang tanan nga mosalmot sa mga kalihukan sa paghatag og importansiya sa Bibliya niining bulan sa Enero. Mahimo usab nga mobisita sa facebook page sa Archdiocesan Bible Apostolate of Davao alang sa bisan unsang matampo.

“Ang pulong sa Dios importante kaayo kay sama kini sa pagkaon nga mag-lig-on kanato; kon wala kitay kaon makuyapan kita,” paambit ni Bro. Concordio Pondias gikan sa San Lorenzo Ruiz Parish sa Talomo atol sa ilang programa nga Giya sa Pagtoo sa DXGN 89.9 Spirit FM matag Lunes sa alas 7:00 sa gabii.

Giduso gayod sa apostolado sa Bibliya nga ang pulong sa Dios makapahiuli sa tanang nagun-ob nga kahimtang sa moralidad, sosyal, pisikal ug espiritwal.