Misa gihalad pasalamat sa mga boluntaryo

Gipangulohan ni Fr. Allan Rodriguez, kura paroko sa San Pablo Parish, ang misa-pasalamat sa mga boluntaryo nga gitawag og Parish Disaster Action Response Team kon PDART.

Atol sa misa gidawat ang mga bag-ong miyembro sa maong grupo nga mga kabatan-onan. Sila mitapos sa daghang mga semana sa ilang pormasyon ug training aron sila makatabang sa pagpahiluna sa mga kalihukan nga adunay tigum niining panahon sa pandemya.

Sa pagpangulo ni Mr. Eric Hernandez, daghan ang nakat-onan nga kasayuran ug kahibalo kining maong mga boluntaryo dili lamang sa mahimo nila kondili usab sa disiplina ug pagkamatinud-anon nga pag-alagad.

Kini pipil lamang sa ilang mga responsibilidad tungod kay sila usab ang aktibo ug gilayon nga motubag sa mga panahon nga adunay mga kalamidad sama sa baha, sunog, linog ug uban pa. Nagpahigayon usab sila sa pagtabang sa pagpanghatag sa mga hinabang ngadto sa mga kabos diha sa mga kalihukan sa parokya ug Archdiocese.

Sa pamalandong ni Fr. Allan panahon sa iyang homiliya sa Misa siya miingon nga “ang daghang mga sama ni Anna sumala sa Ebanghelyo nga kanunay anaa mialagad sa Simbahan mao kamo karon nga ania dinhi. Dako ang inyong gikatampo nga maayo alang sa simbahan diha sa inyong paghatag sa inyong kaugalingon sa malipayon ug mapaubsanon sa kanunay nga pag-alagad.”

Kining maong mga boluntaryo dako ang gikatabang dili lamang diha sulod sa simbahan sa parokya kondili usab sa mga Misa nga gipahigayon sa mga Gagmayng Kristohanong Katilingban. Sila gayod ang mag-una pag-abot sa mga tawo, mounong panahon sa Misa ug maulahi nga mobiya kung nahiluna na ang tanan.