Gipanalanginan sila

Kapistahan sa Santo Nino (January 17, 2021)
Is. 9:1-6 / Sal. 97:1-6 / Eph. 1:3-6, 15-18 / Mk. 10:13-16

Karong tuiga, mao ang ika-500 nga kasumaran natong mga Pilipinhon nga nahimong Kristiyao. Ang mahal nga Santo Nino maoy dakog papel sa atong pagtoo tungod kay ang imahe niini maoy unang gasa sa mga unang nahimong Kristiyano. Dinhi nabati sa mga magtotoo ang panalangin sa Dios kanato. Mao man gani nga daghan ang mga deboto sa Mahal nga Santo Nino. Atong pamalandongan nga:

Ang panalanging sa Ginoo wala diha sa kasubo. Mao kini ang gisaysay ni Propeta Isaias sa unang pagbasa. Ang pag-abot sa kahayag nga moa si Kristo nagdalag kalipay ug kamaya. Kining kamaya nadayag diha sa paggupok sa mga yugo sa kabug-at nga gipas-an ug sa pagguba sa gamit sa sundalo sa gira kay natawo na ang Prinsepe sa kalinaw.

Ang panalangin sa Ginoo wala diha sa pagsalikway. Sa ikaduhang pagbasa, tataw kaayo nga wala kita gisalikway sa Ginoo, kondili gipili nang daan sa wala pa buhata ang kalibotan. Naiya na kita tungod sa iyang mahigugmaong pagsagop. Mao nga angayan nga magpasalamat kita kanunay sa iyang maayong buhat ug pagtagad kanato.

Ang panalangin sa Ginoo wala diha sa pagkasaba. Sa Ebanghelyo, sukwahi sa kasuko ug pagkasaba sa mga tawo ngadto sa mga bata, ang Ginoong Hesus, mitapion hinuon sa iyang kamot kanila ug nanalangin kanila. Iyang gipaduol kaniya ang mga bata kay kinsa kadtong adunay kinaiya nga sama sa mga bata, makasulod sa Gingharian sa langit.

Sa atong pagsaulog sa ika-500 nga kasumaran sa atong pagka-Kristiyanos malipayon ba kita ug nagmaya sa dili matupngan nga kaayo nga gihimo sa Ginoo kanato? Nagdawatay ba kita sa usa’g usa isip mga sakop sa atong katilingban, mga magtotoo ug mga Pilipino? Andam ba kita nga mosabot nga puno sa pasensiya sa matag usa inay kita masuk-anon ug kanunay mangasaba? Magmaya, magdawatay ug magpasensiyahay kita sa usa’g usa. Pit Senyor kanatong tanan!