Giduol, gikuptan, gipabangon

Ikalima nga Domingo sa Tuig (February 7, 2021)
Jb 7:1-4, 6-7 | Ps 147:1-2, 3-4, 5-6 | 1 Cor 9:16-19, 22-23 | Mk 1:29-39

Daghan kanato nalibog kon asa makaduol niining panahon sa panginahanglan. Adunay nahadlok nga makuptan tungod sa pagtakod sa kagaw ug sakit. Pipila nato natumba ug naluya tungod sa krisis karon. Unsaon nato pagpangita sa kahupayan?

Kasagaran nato, ilabinag ang laing tawo maoy naay tuyo kanato moingon kita nga siya maoy angayan nga moduol kanako kay siya maoy adunay tuyo. Apan sukwahi kini sa gipakita ni Hesus sa Ebanghelyo karon, siya mismo ang miduol sa masakiton aron iyang ayohon. Wala siyay garbo nga magpapresyo sa iyang kaugalingon. Iyang gipuy-an ang mapaubsanong pagtabang sa nanginahanglan. Kini ang gisulti ni San Pablo sa ikaduhang pagbasa, “wala akoy garbo katungod sa pagpasigarbo tungod lamang kay nagwali ako sa ebanghelyo, sanglit gisugo man ako pagbuhat niini. Alaot ako kon wala pa ako magwali sa Ebanghelyo.”

Kasagaran nato karon maglikay sa pagkuptanan sa mga kamot tungod sa kahadlok nga matakdan o makatakod sa COVID 19. Apan sa Ebanghelyo, si Kristo mikupot sa kamot sa masakiton. Ang iyang pagkupot nakatakod dili sa kaluya ug sakit kondili ang kalig-on ug kaayohan. Ang iyang pagkupot magdalag kalipay, maghupay sa mga gibati nga kasakit. Mao kini ang hinungdan nga sa Salmo angay daygon ang Ginoo kay gitukod ug gilig-on kita niya pag-usab.

Kasagaran nato kung adunay madagma mokatawa lamang ug dili motabang. Sa Ebanghelyo, si Hesus mipabangon sa nagluya ug nalup-og sa sakit. Mibati si Jesus sa kasinatian ni Job sa unang pagbasa sa mga nag-aginod, naalaot, mga nanghuypaw, sa nangandoy nga mosilong ug naguol. Buot ni Hesus nga sila malingkawas niini. Siya naghatag og paglaum.

Anaa kang Hesukristo ang maong kahupayan sa atong mga kasakit, kaluya ug kabalaka. Mosalig kita nga niining panahona kitang tanan gitawag nga mamahimong kahupayan sa uban pinaagi sa atong maayong pagtagad sa uban. Kita unta, sama kang Hesus moduol, mokupot ug mopabangon sa nagluya ug napukan natong mga kaigsuonan pinaagi sa atong pagtabang kanila.