Dili babag ang pandemya sa pagsimba sa Batang Hesus

Dili babag ang pandemya ug distansya aron masaulog sa atong mga kaigsoonan nga nahisakop sa mga lagyong GKK sa San Alfonso Ma. de Ligouri Parish ang kapistahan sa batang Hesus.

Dako ang kalipay sa atong mga kaigsoonan sa tulo ka GKK nga gi patronahan sa Batang Hesus sa sitio Ilihan, brgy. Mandug, Sitio lower Quabo, Brgy. Callawa, ug Purok Uyon 2, Brgy. New Carmen sakop sa distrito sa Tugbok, nga bisan paman sa gilay-on niini parokya sa San Alfonso nga nahimutang sa centro sa Brgy. Mandug, nakahigayon gihapon silag saulog sa santos nga misa alang sa kapistahan sailang patron.

Wala gayod panumbalinga ni Rev. Father Jemasol “Jojo” Ortiz ug mga staff sa parokya ang pagbaktas sa mga lapuk na dalan ug ang kainit sa adlaw aron lamang maadtoan ang mga maong nasangpit na GKK.

Sulod sa iyang homiliya diin sentro ang mga kabataan, gipahinumduman ni Fr. Jojo ang mga ginikinanan na mitambong sa misa na dili gayud pugngan ilang mga anak nga mahidool sa Ginoo, pinaagi sa pag alagad sa simbahan. Iya usab nga gipahinumduman ang mga katawhan na pirming sundon ang mga pahimangno sa local na pang-gamhanan kontra COVID-19 nga mao ang paghugas ug kamot gamit ang sabon ug tubig, pagtabon sa baba ug ilong gamit ang facemasks, paglayo sa ubang tawo ug ang pagpundo sa balay, gani kamatikdan ang pag sunod sa katawhan sa maong pahimangno.

Kamatikdan usab nga adunay kausaban sa mga kapilya sa mga nahisgutang GKK nga sumala pa kay Fr. Jojo wala gayod naghakog ang mga sakop sa mga maong katilingban bisan paman adunay pandemya.

Pinasahi usab ang kabag-ohan sa kapilya sa Purok uyon 2 sa Brgy. New Carmen. Sumala sa PSK sa maong GKK nga mao si Rhea Gumalawe na mao na kini ang ulahing misa na pagahimoon sa ilang kapilya kay nakataknang gubaon ang kapilya kay nahisakop na kini sa usa ka pribadong luna nga gipanag-iyahan sa usa ka dako ug ilado nga kumpanya sa nasod. Hawan na ang kaniadtong napalibutan ug mga gambalay nga kapilya kay tungod sila na relocate na unahan sa maong pribadong luna nga gawas na sa visinidad niini kung asa didto usab kasamtangang ginatukod ang ilang bag-ong kapilya .

Sigun usab sa Pangulo na nasugdan na ang flooring sa kapilya sa bag o niining luna. Gipasalamatan usab niya ang mga pangulo sa nagkalain-laing mga ministriya sa ilang GKK nga nangunay sa pagtukod niini ug nag tabang nga mamahimong malampuson ang pagsaulog nila sa kapistahan ni Sr. Santo Niño bisan pa man sa atong makalisod na kahimtang karon.

Sa katapusan, naghiusa ang mga katawhan sa pag ampo na mahalikay ang mga frontliners sa maong sakit, kaayuhan sa mga natapdan, pag ampo sa mga nangamatay tungod niini ug ang pag undang sa pagkuyanap pa sa pandemya. (Jomar Earl Narciso | San Alfonso Parish SocCom)