Bag-ong awit sa Bibliya gisulat

Usa sa mga song compositions ni Fr. Dionisio C. Tabiliran, ang kasamtangang Kura Paroko sa St. Mary of the Perpetual Rosary Parish, mao ang Awit nga nag-ulohan og “Pulong sa Ginoo Makapahiuli” o “God’s Word Restores”.

Kini gipahaum sa tema sa pagsaulog sa National Bible Sunday nga gipahigayon sa matag parokya niadtong Enero 24, 2021 sumala sa giya nga gihatag sa Archdiocesan Bible Apostolate of Davao, uban ni Mrs. Mila Punsalan nga maoy Archdiocesan Coordinator sa tibuok Archdiocese sa Davao.

Madasigong gihimoan og tono ni Marlon Dawa, usa ka organista nga gikan sa San Miguel Parish, ang naasyo nga awit. Dayag kaayo nga ang Pulong sa Dios buhi ug gamhanan ug gani mao kini ang nakadasig sa mga magtutuo nga mopadayon sa pag-atubang sa mga hagit sa kinabuhi ug naghatag og paglaum sa mga makasasala nga mobalik ngadto sa Dios ilabina niadtong anaa sa kangingit.

Title: “Ang pulong sa Ginoo makapahiuli”
Lyrics by: Fr. Dionisio Tabiliran
Music by: Marlon Dawa
Date: Jan. 16, 2021

1. Ang Buhing pulong sa Dios dugukan sa kinabuhi alang sa masaligon ug malaumon sa Dios nga maoy tuburan sa tanan.
2. Ang Pulong maka-alim. Nagpahi-uli kanato nga makasasala ug nahisalaag balik ngadto sa mahigugmaong Dios.
3. Ang imong buhing pulong naghiusa namong tanan diha kang Kristo isip bag-ong katawhan nga nahi-uli’g nahibalik kanimo.
4. Ang imong buhing pulong Kadasig sa malaumon kalig-on sa takna sa mga pagsulay Kaayuhan sa among balatian.

(Madelyn Tito)