Paglipay

Ika-3 nga Domingo sa Adbiyento (December 13, 2020)
Is. 61:1-2a, 10-11 / 1 Thes. 5:16-24 / Jn. 1:6-8, 19-28

Daghan karon moingon aduna pa bay rason sa kalipay niining panahona nga krisis man. Dunay uban wala nay makitang hinungdan sa kalipay kay nagpait kuno ang panahon. Ang uban nawad-an na og gana kay lagi menos ang bonus ug uban wala na gani trabaho.

Bisan gani ang propeta Isaias nalipay diha sa Ginoo nga maoy nagbisti kaniya sa kaluwasan. Ang iyang kalipay nagsukad sa pagsalig nga ang Dios mopabalik sa kasing-kasing sa katawhan sa pag-ila sa Dios, nga mobiya na sa kamapahitas-on, kahakog ug ubang pagpakasala. Kining kalipay gikan sa pagsalig nga ang Dios mopatigbabaw sa kasing-kasing sa tawo sa kaamguhan nga siya gihatagag pabor nga mamungag maayong bunga sama sa usa ka tanaman nga iyang giatiman.

Ang hagit ni San Pablo sa mga taga Tesalonica nga maglipay kanunay diha sa pagbuhat ug maayo ug kanunay nga pag-ampo, mao usab ang hagit sa matag usa kanato karon. Ang gasa sa Espiritu Santo u gang grasya sa pagkahingpit mas labaw nga angay natong mapuy-an karon. Sa mga tawo nga nawad-an og kapaninguhaan tungod kay wala na silay trabaho, sa mga nagkasakit sa COVID, sa mga naluya na ug midag-um ang kaugmaon, kini sila ang angay natong tabangan. Karon ang higayon nga mas mapakita nato ang kalipay nga tinuoray nga dili gikan sa mga butang lamang, kondili sa tinuod nga pagdawat sa usa’g usa labina sa panahon nga kita nanginahanglan.

Ang ehemplo ni San Juan nga puno sa pagpaubos maoy dalan sa matuod nga kalipay. Ang tawong mapaubsanon, modawat sa tanang kamatuoran. Siya modawat nga siya nanginahanglan apan siya usab dunay ikatampo bisan diyutay. Ang mapaubsanon mosangpit sa panabang sa Dios sa iyang pagsalig nga ang Dios padayon nga mosapnay kanunay kaniya. Kining pagpaubos mao usab unta ang maghari kanato aron maangkon nato ang matuod nga kalipay. Kining maong pagpaubos maoy magdalag pagsalig dili sa kaugalingon kondili sa Dios lamang.

Busa pagliapy pinaagi sa pagsalig sa kaluwasan sa Ginoo, sa kanunay nga pagbuhat og maayo ug sa pag-ampo, ug sa pagpuyo nga mapaubsanon.