Misa de gallo gidagsa taliwala sa pandemya

Human gipatuman ni Arsobispo Romulo G. Valles, D.D., Obispo sa Davao ug Presidente sa Catholic Bishops’ Conference of the Philippines (CBCP), napuno ang mga simbahan o parokya sa Archdiocese sa Davao ug mga kasikbit nga mga diyosesis diin gipahigayon ang naandan nga siyam ka kaadlawon nga Misa de Gallo sugod Disyembre 16.

Gipaningkamotan gayod sa mga parokya, uban sa panabang sa mga awtoridad nga masunod ang mga protocol sama sa social distancing, face mask ug face shield ug uban pa.

Dunay mga lugar diin ang manimbahay gipapauli tungod kay walay dala nga face shield o kaha dili na masakto sa lugar tungod kay makalapas na kini sa distancing. Apan gidawat kini sa mga hingtungdan nga puno sa pagpaubos taliwala sa kahingawa nga makaapil sa misa. Ang uban kanila misalmot na lamang sa radyo ug online mass pinaagi sa DXGN 89.9 Spirit FM-Davao.

Bisan sa dakong kalainan nga kalihukan karong tuiga, tataw nga gipakita sa mga deboto ang pagsalig ug pagpasalamat sa Dios samtang nangandam sa pagsaulog sa Pasko sa pagkatawo sa Ginoo.