Mga kabatan-onan nagpakitag kaikag sa pag-alagad panahon sa pandemya

Dakong tabang sa mga parokya ang mga volunteers nga mga kabatan-onan sa pagpahigayon sa mga protocols panahon sa tigom sa mga misa.

Ang Social Action Center sa Archdiocese sa Davao pinangulohan sa Direktor nga si Fr. Bong Dublan maoy nangusog nga maorganisa ang Parish Disaster Response Team aron maoy motabang sa mga disasters ug panahon nga sama niining pandemya.

Naningkamot ang mga parokya sa Archdiocese sa Davao nga adunay mga volunteers nga ma-train niini ug karon nakita nga sila gayod nakatabang sa paghan-ay niining maong mag tigom sa katawhan. Kahigayonan usab kini diin sila nga mga batan-on nga volunteers natudloan sa disiplina sa kaugalingon.

Sa Parokya sa San Pablo, Matina, pinangulohan ni Mr. Eric Hernandez, na ang nag-andam sa mga lingkuranan sa gawas sa simbahan bisperas pa lang sa mga Misa De Gallo. Sila usab ang magtabang panahon sa kolekta ug mogiya sa mga agianan panahon sa pagkalawat ug pagpanggawas sa mga tawo.