Damha ang wala damha

Ika-4 nga Domingo sa Adbiyento (December 20, 2020)
2 Sam. 7:1-5, 8b-12, 14a, 16 / Sal. 89 / Rom. 16:25-27 / Lk. 1:26-38

Sa unang pagbasa wala damha nga si David, nga usa lamang ka magbalantay sa karnero, napili sa Dios nga usa ka inila nga hari, kansang gingharian natukod ug napalig-on uban sa mga kadaugan. Ang iyang kaliwat dungganon ug dili mahikalimtan sa kasaysayan.

Kini nahitabo tungod kay ang Dios maoy makapalig-on sumala sa Maayong Balita nga giwali ni San Pablo, sumala sa ikaduhang pagbasa. Siya ang Dios nga angay daygon kay siya nagpakita sa iyang gahum sa katawhan nga iyang giluwas.

Mao nga sa Salmo walay katapusan ang pag-awit sa kaayo sa Ginoo. Siya tinuod nga nagbuhat og kaayo sa iyang katawhan nga gipangga ug gipanalipdan.

Wala usaba damha ni Maria ang dakong gasa sa pagkabulahan nga mamahimong inahan sa Anak sa Dios. Sa Ebanghelyo, si Maria nahingangha sa dakong pabor ug panalangin sa Dios nga pinaagi kaniya mahimugso ang Manluluwas nga dugay na nga gipaabot sa katawhan. Walay imposible atubangan sa Dios kay siya gamhanan ug katingalahan ang iyang mga maayong buhat.

Busa uban sa Dios nga makahimo nga walay imposible, damhon ta ang di madahom nga mga maayong hitabo. Taliwala sa usahay dili nato masabot nga palibot, tawo, butang, o panghitabo sama sa pandemya, kining tanan atong isang-at sa Ginoo kay siya na ang mopahiluna kanato. Modawat lamang kita sa atong pagka-dili angayan apan mosalig sa Dios sama kang David. Modawat lamang kita sa matag mensahe sa Dios nga atong sutaon matag adlaw diha sa iyang pulong, sa Eyukaristiya ug sa matag kasinatian nato. Motahan lamang kita sa atong kaugalingon sama kang Maria nga himuon ang maayo kay ang Dios na ang mohulip sa dili nato mahimo. Sulogoon lamang kita niya, matuman ang iyang pagbuot kay siya moabot gayod. Damhon ta ang wala nato damha nga mga kaayo sa pagluwas sa Ginoo.