Ayaw kahadlok

Pangilin sa Sagrada Pamilya (December 27, 2020)
Gen. 15:1-6; 21:1-3 / Sal. 105 / Heb. 11:8, 11-12, 17-19 / Lk. 2:22-40

Dakong kalahian ang pagsaulog nato niining Pasko taliwala sa pandemya. Tungod kay kini nagdalag kahadlok ug kabalaka sa kadaghanan. Gani pinugngan ang atong pagtigom sa publiko karon. Ang uban nahadlok nga mataptan sa sakit ug ang uban nahadlok unsay dangatan sa umaabot nga mangitngit.

Apan ang Pasko pagsaulog sa kahayag nga mao si Kristo, ang Manunubos. Mao gani nga si Abraham giingnan sa anghel, “Ayaw kahadlok!” Ang Dios manalipod ug moganti sa mga tawo nga sama kang Abraham puno sa pagsalig ug pagtoo. Kining maong pagtoo maoy nakapahimo kaniya nga molipang sa kalibutn, kanang pagtoo nga nagdala kaniya sa pagtahan sa tanan maoy naghatod kaniya sa daghang panalangin. Siya misalign nga bisan sa nag-ungaw nga kamatayon ang Dios moluwas ug dili motugot nga siya mapukan.

Sama kang Abraham nga kontento ug masaligon sa presensiya sa Dios, si Simeon usab nakakita sa dakong kaluwasan sa iyang taliwala. Wala na siyay gipangandoy pa kay nasuta niya ang kahayag nga miabot, ang gisaad nga natuman, ang Dios nga ania nakig-uban kanato. Nagtuman lamang siya sa gibapuhat sa Dios kaniya.

Manghinaut kita mga igsuon, nga sama kang Abraham ug Simeon, mosunod lamang kita sa gipabuhat alang sa kaayohan sa kadaghanan sama sa mga protocols sa panggamhanan. Mosunod lamang kita sa pagpugong diha sa paglakaw-lakaw bisan asa sa gusto natong lugar ug oras. Kay kining tanan alang man sa kaayohan.

Ang Dios mao untay atong kalig-on ug sandigan nga taliwala sa mga kahadlok ug kabalaka, siya dili mobiya kanato pinaagi sa iyang mga grasya nga usahay wala nato damha. Gani, higayon kini karon sa pagpalig-on sa relasyon sa atong tagsa-tagsa ka pamilya aron mosalig kita sa kakayahan ug talent sa matag usa nga dunay ikatampo alang sa kaayohan. Magkugi lamang kita ng tinuoray ug padayon nga maningkamot nga Diniyos kay siya manalangin sa matag usa. Busa ayaw kahadlok!