Unsay imong gihimo sa mga labing ubos?

Solemnidad ni Kristong Hari (November 22, 2020)
Ez. 14:11-12, 15-17 / Sal. 23:1-6 / 1 Cor. 15:20-26, 28 / Mt. 25:31-46

Niining Solemnidad ni Kristong Hari sa tibuok kalibutan, ang Dios nagpadayag sa iyang pagkabuhong sa kalooy. Siya usa ka hari nga dili hawod-haworon, ni walay balatian. Siya usa hari nga mobati sa panginahanglan sa uban ug puno sa puangod.

Sa unang pagbasa ang Dios nagpakitag kalooy kanatong labing ubos tungod sa atong mga sala pinaagi sa pag-atiman kanato samag mga karnero. Iyang pabalikon ang mga nahisalaag ug nahilayo kaniya. Kining krisis sa COVID 19 usa ka pamaagi sa Dios aron kita iyang makaplagan pag-usab gikan sa atong paghikalimot kaniya. Sama sa mga karnero nga namiligro ug nahisalaag, kita iyang gipaamgo nga dili sa atong makaya ug gahum lamang kita mosalig, kondili sa iyang kaalam, aron dili kita mamintaha ug magpahimulos sa kalisod sa uban.

Sa ikaduhang pagbasa, ang Dios naghald sa iyang kinabuhi aron kita malingkawas sa kamatayon. Siya nagluwas kanato sa kangitngit ug peligro sama kahadlok nato panahon niining COVID 19. Siya manalipod sa tawong mopuyo sa panimalay, mosunod sa mga protocol ug mapaubsanon nga mopugong sa kaugalingon sa dili importanteng mga lakaw. Sa iyang kalooy siya mobuntog sa namatyan sa pagtoo tungod sa pagkakalibotanon, ug karon iyang gipabuhi kanato ang pagsalig kaniya tungod kay nalooy siya kanato.

Sa Ebanghelyo, ang Dios anaa sa mga makalolooy. Siya naghulat nga kaloy-an human nga siya nagapakitag kalooy. Naghulat siya nga makita kanato sa mga labing ubos natong kaigsuonan nga nawad-an og trabaho, kapaninguhaan, kabaskog ug kadasig niining panahon sa krisis. Siya anaa naghulat nga atong tabangan sa mga wala nay gikaon o mainom, sa mga nasakit ug gisalikway tungod sa COVID. Siya nagpaabot nga atong buhatan sa kalooy niadtong mga tawong walay kagawasan tungod sa ilang kaluya karong panahona.

Ikaw, unsa bay gihimo nimo sa mga labing ubos?