Pagtukaw kay wala ka mahibalo sa adlaw o sa takna

Ika-32 nga Domingo sa Ordinaryong Panahon (November 8, 2020)
Ka. 6:12-16 / Sal. 63:2-8 / 1 Thes. 4:13-18 / Mt. 25:1-13

Nakabantay ba ang matag usa kanato sa pag-abot niining maong pandemya sa COVID 19? Nakaandam ba sa mga tukmang solusyon ang mga lideres sa tibuok kalibutan sa pag-abot niining maong krisis?

Ang pagtukaw maoy nagpasulabing pahimangno sa atong mga pagbasa karon. Sa unang pagbasa, ang pagpangita sa kaalam maoy makapabangon kanato sayo sa buntag. Kini magluwas sa mga kalisdanan ug maghatod sa kanunay nga pagmatngon. Hinaut nga bisan nimenos ang kahigayon sa imong kapaninguhaan karong panahon sa pandemya, ikaw mapuno sa kaalam nga maghatag hinungdan sa sayo nimng pagbangon matag adlaw.

Sa ikaduhang pagbasa, ang mga taga-Tesalonika gidasig ni San Pablo sa dili pagwala sa ilang paglaom, ilabina sa ilang kasinatian sa mga nahikatulog. Si Hesus nga mibangon gikan sa kamatayon mao unta ang hinungdan sa kanunay nga pagpuyo sa kadasig. Niining panahon sa pandemya, adunay atong mga kaigsuonan kinsa nawad-an sa gana tungod kay mipanaw ang ilang mga mahal sa kinabuhi. Hinaot nga sila atong dasigon aron mobalik nga mabuhi ang ilang dugo sa pagpadayon sa pagpuyo nga malipayon sa gasa sa kinabuhi.

Diha sa Ebanghelyo, ang pag-abot sa kinasal kinahanglang pangandaman pinaagi sa pinaabtik nga pagpaabot kanunay ug dili sa paghikatulog. Tingalig ang uban kanato nawad-an na og paglaum sa pagpaabot kanus-a pa mahuman kining krisis ug kanus-a pa ang bakuna moabot. Dili unta kita mobuhi sa pagsalig nga malingkawas kita sa peligro niining maong sakit. Padayon tang mag-ampo, magtinabangay sa mga naglisod bisan ginagmay natong ikatunol. Atong dasigon ang paningkamot sa atong mga lideres ug suportahan ang mga yanong mga kaigsuonan.

Kung daghan man kanato wala kabantay niining maong krisis nga miabot, dili pa ulahi ang tanan. Mahimo pa kitang mobangon ug madasigong mopakita sa tiunay nga pagtoo panahon sa pagsulay. Busa pagtukaw kay wala ka mahibalo sa adlaw o sa takna.