Pagbansay sa pagtoo sa pag-abot sa Ginoo

Unang Domingo sa Adbiyento (Nov. 29, 2020)
Is. 63:16b-17, 19b, 64:2-7 / Sal. 80 / 1 Cor. 1:3-9 / Mk. 13:33-37

Niining unang Domingo sa Adbiyento, nabati mo ba ang dakong kalainan sa mga milabay nga tuig sa panahon sa Adbiyento?

Sama sa katawhan sa kapanahonan ni Isaias, daghan kanato nakapangutana usab kon nganong gisulayan kita sa Ginoo niiining panahona. Kita nangita sa tubag ngano nga daw nasuko ang Ginoo kanato ug nga kita unta makaamgo sa atong mga sala. Kining mga pangutana bunga sa nagsunod-sunod nga kalisod nga atong nasinati ug walay kasigurohan hangtod kanus-a matapos kining mga pagsulay.

Apan sama usab kang San Pablo nga nagpasalamat sa Ginoo tungod sa pagtoo sa mga taga Corinto, siya nga nagdayeg sa Dios tungod sa gipakita nilang mga gasa nga espirituhanon, kita usab unta makaamgo nga anaa usab kita niining maong mga gasa. Nakita nato nga sa milabay nga mga Domingo, daghan kanato, taliwala sa kalisod, mitunol sa hinabang alang sa atong mga kaigsuonan nga nabiktima sa bagyo ug baha sa Luzon. Kini nagpakita lamang nga sama sa mga taga Corinto, lig-on usab kita taliwala sa daghang mga pagsulay ug misalign gihapon sa panabang sa Ginoo nga atong gipakita gayod sa buhat.

Niining unang Domingo sa Adbiyento, tukma lamang ang atong pagtukaw, pagmata kanunay ug pagpangandam kay wala kita masayod kanus-a mobalik ang Ginoo. Apan angay lamang nga paagi sa pagbansay sa Adbiyento ang kanunay natong pagbuhat sa maayo pinaagi sa paghuna-huna sa uban ug sa padayon nga pagtunol sa atong hinabang kutob sa mahimo, bisan pa man kung kita naglisod usab. Ang pagpugong sa paglakaw bisan asa ug bisan unsang orasa, ang pagpugong sa pagpalit sa dili kaayo kinahanglan niining panahona, ang pagsunod uban sa pasensiya sa mga protocol nga gitakda sa atong mga awtoridad, kining tanan konkretong pagbansay sa panahon sa Adbiyento.

Tinuod dunay dakong kalainan kining panahona sa Adbiyento. Atong bation ug bansayon ang pagtoo nga matag adlaw kahigayonan sa pag-abot sa Ginoo sa atong taliwala.