Ihatag ang tanan

Ika-33 nga Domingo sa Ordinaryong Panahon (November 15, 2020)
Pan. 31:10-13, 19-20 / Sal. 128:1-5 / 1 Thes. 5:1-6 / Mt. 25:14-30

Niining panahon sa pandemya, hain ka man nahimutang, sa modawat ba o sa mohatag? Kinsa ka ba karon, usa ba sa nagpaabot nga makadawat o naghimog lakang nga makahatag?

Ang Ebanghelyo nagsaysay niining kamatuoran nga ang matag usa kanato gihatagan na sa Ginoo. Nia na kanato ang atong gikinahanglan, dili ang nagustuhan lamang, niining kalibotana. Sa unsa may makatampo sa atong paglahutay sa pagpakabuhi, sama sa panglawas, kahibalo, panahon, kapaninguhaan, kining tanan gitanyag sa Ginoo. Mapahimuslan nato kini kung kita molihok nga puno sa pasensiya ug pagsalig sa iyang grasya. Mao kini ang gihimo sa tawo nga nakadawat ug diyotay ug kini iyang gialimahan aron kini modaghan inig balik na sa iyang agalon. Ikaw nakaamgo ka nga kumpleto ka ug adunay mga gasa? Imo ba kining gigamit aron palambuon?

Pinaagi sa pagtandi sa usa ka maayong asawa, gihagit kita diha sa unang pagbasa nga molabaw pa kaysa panggawas ug maanyag nga hitsura ang atong kaayo. Ang kaanyag sa kinaiya, sa kinahiladman maoy labing importante. Kini mapakita sa paghatag sa tanan natong mahimo nga maayo sa walay paghulat og balos o bayad.

Kinahanglan kini nga atong himoon, ang paghatag sa tanan natong mahimo nga maayo kay matod pa sa ikaduhang pagbasa, dili nato masayran kanus-a mobalik ang Ginoo. Siya sa kalit lamang mamhimong motungha sa atong taliwala. Usahay siya motungha diha sa matag adlaw nato nga makita sa mga tawo nga kabos ug wala nay trabaho niining panahon sa pandemya. Ang Ginoo usahay motungha diha sa atong higala nga nanginahanglan tabangan kay nagkasakit, nga mamahimon natong ubanan o bisitahan o tunolan sa iyang tambal nga gikinahanglan.

Bisan tuod matag usa kanato karon mibati sa krisis, apan panahon usab kini sa grasya. Gitanyag kanato ang grasya sa paghuna-huna dili lamang sa atong panginahanglan kondili sa panginahanglan usab sa uban nga mas naglisod pa kaya kanato bisan pa man usab kita nagpait. Disiplinahon ta ug pugngan ta ang atong kaugalingon sa dili kaayo importante aron nga mahatag nato ang tanan sa Ginoo ug sa atong isigkatawo.