Ayaw kamo kabalaka

Ikaduhang Domingo sa Adbiyento (December 6, 2020)
Is. 40:1-5, 9-11 / Sal. 85 / 2 Ped. 3:8-14 / Mk. 1:1-8

Tingali daghan kanato nabalaka sa pagkakaron. Nabalaka unsay dangatan dili lamang sa umaabot nga pasko, kondili sa sunod tuig moabot. Nabalaka sa kahimtang sa COVID 19 nga daw walay pay kasiguroan nga sulbad.

Apan ang unang pagbasa nag-ingon: Ayaw kamo kabalaka, katawhan ko. Dasiga ang Jerusalem ug ingna siya nga wala nay gubat, nga gipasaylo na ang iyang mga sala ug nga siya nakadawat nag dobling silot alang sa tanan niyang kalapasan. Imantala ang maayong balita nga ania na ang Dios.

Ang Salmo nagpadayag sa pagsaligsa kaayo sa Ginoo. Siya moluwas kanato.

Ang ikaduhang pagbasa nagpahinumdom: Ayaw ninyo hikalimti nga sa Ginoo ang usa ka adlaw ingon sa 1,000 ka tuuig u gang 1,000 ka tuig ingon lamang sa us aka adlaw. Ang Ginoo dili maglangan pagtuman sa iyang gisaad. Apan ang adlaw sa Ginoo moabot ingon sa usa ka kawatan. Kinahanglan nga magkinabuhi kamo nga balaan ug ihalad ang inyong kinabuhi ngadto sa Dios samtang maghulat kamo sa Adlaw sa Dios, ug buhata niyo kutob sa inyong mahimo.

Ang Ebanghelyo nagdala kanato sa kamatuoran nga si Juan maoy saksi sa pag-abot sa Manluluwas. Siya nag-andam sa dalan sa pakig-uli ug pasaylo. Dili siya gani angayan nga mohubad sa sandalyas kay ang Mesiyas magbag-o kanaato sa Espiritu.

Kung nabati man nato nga kita gipalisod-lisod karon o kaha daw gisilotan, kini pagpaamgo lamang nga kita nanginahanglan sa kalooy ug pasaylo sa Ginoo. Kung nabait nato nga kita nagpait, kini patilaw lamang nga ang Dios ania kung kita mosalig lamang sa kanunay niyang presensiya ug dili kita niya pasagdan. Kung nabati ang kahadlok o kabalaka, kini pagkuhit lamang aron kita molambo gikan sa pagkasentro sa materyal o pisikal lamang nga sukod ngadto sa paglambo sa espirituhanong  ang-ang sa panaw sa kinabuhi.

Busa pagmadasigon ug ayaw na kabalaka.